Mga Kababayin-an sa Bug-os nga Globo
SANG ang unang mag-asawa nagrebelde batok sa Dios, gintagna ni Jehova ang makahalalit nga mga resulta nga mahanabo sa ila kag sa ila mga kaanakan. Si Jehova nagsiling kay Eva: “Ang imo handum mangin sa imo bana, kag sia magagahom sa imo.” (Genesis 3:16) Ang Biblia dalayon nga nagapalig-on sang tudok nga pagtahod para sa mga kababayin-an, kag minilyon ka kababayin-an ang nagaagom sing mas makalilipay, mas makaalayaw nga pagkabuhi bangod ginaaplikar nila kag sang ila pamilya ang mga prinsipio sang Biblia.
Apang, suno sa ulihi nga report tuhoy sa tawhanon nga mga kinamatarong, madamong iban pa nga mga kababayin-an sa bug-os nga kalibutan ang ginapakahuy-an, ginahingalitan, kag ginapakanubo. Nagakomento sa report, ang International Herald Tribune nagasiling: “Sa masakit nga detalye, ang report sa 193 ka pungsod . . . nagalarawan sang masubo nga kahimtangan sang adlaw-adlaw nga pagpasulabi kag pag-abuso.”
Pila pa ka halimbawa: Sa sentral Aprika, ang mga babayi dapat maghimo sang kalabanan nga mabug-at nga trabaho sa panguma, kag tatlo ka pilo nga mga lalaki ang nagaeskwela sangsa mga babayi. Sa isa ka pungsod didto, ang panglahi indi legal sa mga kababayin-an apang para sa mga kalalakin-an legal ini. Ang layi sang isa pa ka pungsod sa Aprika nagapasaylo sa bana nga magpatay sang iya asawa kon madakpan niya sia nga nagapanglahi, apang wala ginapasaylo sang layi ang isa ka babayi nga makapatay sang iya bana sa kaanggid nga mga kahimtangan.
Ang report nagasiling nga sa mga bahin sang Bagatnan nga Amerika, ang mga pulis wala nagasimpatiya sa ginasakit nga mga kababayin-an. Kag ang nagaobra nga mga kababayin-an masunson nga nagabaton sing kubos sa 30 tubtob 40 porsiento nga suweldo sangsa mga kalalakin-an.
Sa mga bahin sang Asia, ang mga kababayin-an mga biktima sang pilit nga pagkabaw-as kag mga aborsion. Sa isa ka pungsod, tubtob sa 500,000 ang mga pampam, madamo sa ila ang ginbaligya sa sini sang mga ginikanan nga nagapangita sing kuwarta agod makabakal sing bag-ong mga balay para sa ila kaugalingon. Dapat atubangon sang mga pulis sa isa pa ka pungsod ang lapnag nga “dote nga mga kamatayon”—ang asawa ginapatay sang iya bana ukon sang iya pamilya bangod ang iya dote kulang sangsa ginapaabot.
Nahanungod kay Jesucristo, ang Biblia nagapasalig sa aton: “Magaluwas sia sang nawad-an kon magtuaw sia, sang imol man nga wala sing manugtabang. Magakaawa sia sa imol kag sa nawad-an, kag luwason niya ang mga kalag sang nawad-an. Tubson niya ang ila kalag gikan sa pagpigos kag paglugos, kag ang ila dugo mangin bilidhon sa iya itululok.” (Salmo 72:12-14) Gani may rason kita sa pagpaabot sing maayo nga palaabuton; ang mga kababayin-an sa bug-os nga kalibutan makalaum sang pagluntad sang maayo pa nga mga kahimtangan sa sina nga tion.