Mga Pamangkot Gikan sa mga Bumalasa

May ginapasulabi bala ang Dios sa pagpili sa nahaunang nagadumala nga hubon nga mga lalaki nga naghalin sa pareho nga rasa kag pungsod​—⁠ang tanan mga Judiyo?

Wala, wala sia sing ginapasulabi. Ang tanan nga una nga gintawag ni Jesus subong iya mga disipulo mga Judiyo. Nian, sang Pentecostes 33 C.E., ang mga Judiyo kag ang Judiyo nga mga proselita amo ang una nga ginhaplasan sang balaan nga espiritu kag nangin kalipikado sa paghari upod kay Cristo sa langit. Sang ulihi na lang nga ginlakip ang mga Samaritano kag ang ginkumbertir nga disirkunsidado nga mga Gentil. Gani, halangpunon nga ang nagadumala nga hubon sadto nga tion ginhuman sang mga Judiyo, “mga apostoles kag mga tigulang nga lalaki sa Jerusalem,” subong ginsambit sa Binuhatan 15:⁠2. Mga lalaki sila nga may madalom nga paghangop sa Kasulatan kag tinuig nga eksperiensia sa matuod nga pagsimba, kag may madamo sila nga tion sa pag-uswag agod mangin hamtong Cristianong mga gulang.​—⁠Ipaanggid ang Roma 3:​1, 2.

Sa tion sang pagtilipon sang nagadumala nga hubon nga ginsaysay sa Binuhatan kapitulo 15, madamo nga Gentil ang nangin mga Cristiano. Naglakip ini sang mga Aprikano, mga Europeo, kag mga tawo gikan sa iban nga rehiyon. Apang wala sing rekord nga may mga Gentil nga gindugang sa nagadumala nga hubon agod himuon ang Cristianismo nga makagalanyat sa mga di-Judiyo. Samtang ining bag-ong ginkumbertir nga Cristianong mga Gentil pareho nga katapo sang “Israel sang Dios,” mahimo nga gintahod nila ang pagkahamtong kag mas madamo nga eksperiensia sang Judiyong mga Cristiano, subong sang mga apostoles, nga bahin sadto sang nagadumala nga hubon. (Galacia 6:16) Talupangda sa ­Binuhatan 1:​21, 22 kon daw ano ka halangdon yadto ­nga eksperiensia.​—⁠Hebreo 2:​3; 2 Pedro 1:​18; 1 Juan 1:​1-3.

Sa madamong siniglo nakig-angot ang Dios sa isa ka pinasahi nga paagi sa pungsod sang Israel, diin nagpili si Jesus sang iya mga apostoles. Indi isa ka pagsayop ukon dimakatarunganon nga wala sing apostoles ang naghalin sa ginatawag karon nga Bagatnan nga Amerika ukon Aprika ukon Malayo nga Sidlangan. Sang ulihi ang mga lalaki kag mga babayi gikan sa sadtong mga duog nakatigayon sing mga pribilehiyo nga mas daku sangsa isa ka apostol sa duta, sa isa ka katapo sang nagadumala nga hubon sang unang siglo, ukon sa may palangakuan sa tunga sang katawhan sang Dios sa karon.​—⁠Galacia 3:​27-29.

Ang isa ka apostol napahulag sa pagsiling nga ang “Dios walay pinilian, apang sa tagsa ka pungsod ang tawo nga nagakahadlok sa iya kag nagahimo sing matarong kalahamut-an sa iya.” (Binuhatan 10:​34, 35) Huo, ang mga benepisyo sang gawad ni Cristo matigayon sang tanan, nga walay pinilian. Kag ang mga indibiduwal gikan sa tagsa ka tribo kag hambal kag pungsod mahimo malakip sa langitnon nga Ginharian kag sa dakung kadam-an nga mabuhi sing dayon sa duta.

Madamo nga tawo ang nangin sensitibo tuhoy sa rasa, hambal, ukon ginhalinan nga pungsod. Ginpakita ini sang kon ano ang aton mabasa sa Binuhatan 6:​1 tuhoy sa isa ka hulusayon nga nagtuga sing hinuringhuring sa tunga sang nagapamulong sing Griego nga mga Cristiano kag sa mga nagapamulong sing Hebreo. Mahimo nga gindak-an naton ukon nakatigayon sing tuman nga pagkasensitibo tuhoy sa hambal, rasa, etniko nga ginhalinan ukon sahi sang sekso. Bangod sinang matuod gid nga posibilidad, nagakaigo nga manikasog kita sing lakas agod tugutan ang aton mga balatyagon kag mga reaksion nga madihon sa pagtamod sang Dios, nga ang tanan nga katawhan alalangay sa iya atubangan, walay sapayan kon ano man ang aton hitsura. Sang ginrekord sang Dios ang mga kalipikasyon para sa mga gulang kag ministeryal nga mga alagad, wala niya ginsambit ang tuhoy sa rasa kag ginhalinan nga pungsod. Wala, gintalupangod niya ang espirituwal nga mga kalipikasyon sadtong mahimo makaalagad. Matuod ina sa lokal nga mga gulang, nagalakbay nga mga manugtatap, kag sa mga nagaalagad karon sa sanga talatapan, subong nga matuod ini sa nagadumala nga hubon sang unang siglo.