Ano ang Ginapakita sang Salaming?
MAGTAN-AW sa salaming. Ano ang nakita mo? Kon kaisa, ang pagpasiplat sa salaming nagapakita sang makahuluya nga depekto sa imo dagway nga nalipay ka sa pagkay-o antes ini makita sang iban.
Ang Biblia kaangay gid sang salaming. Makabulig ini sa aton sa pagtigayon sing bunayag nga pagtan-aw sa aton kaugalingon, nga magapugong sa aton gikan sa paghunahuna sing tuman—ukon sing diutay—sang aton pagkatakus sa mga mata sang Dios. (Mateo 10:29-31; Roma 12:3) Dugang pa, sarang mapakita sang Biblia ang mga depekto sa aton hambal, buhat, ukon panimuot nga kinahanglan naton tadlungon. Kon mahanabo ini, indi mo bala pagsapakon ang ginapakita sang salaming?
Ang manunulat sang Biblia nga si Santiago nagsiling: “Kon ang bisan sin-o manugpamati sang pulong, kag indi manugtuman, ining isa kaangay sa tawo nga nagatan-aw sang iya kinaugali nga nawong sa salaming. Kay ginatan-aw niya ang iya kaugalingon, kag nagahalin sia kag sa gilayon nalimot kon ano nga bagay sang tawo sia.”—Santiago 1:23, 24.
Sa kabaliskaran, ginalaragway ni Santiago ang isa pa ka tawo, ang isa nga “nagahimutad sa himpit nga kasuguan nga natungod sa kahilwayan kag nagapadayon sa sini.” (Santiago 1:25) Ang Griegong tinaga nga ginbadbad “nagahimutad” nagakahulugan sang pagtalingi ukon pagdungok sa pagtan-aw. “Kapin pa sa madasig nga pagpasiplat ang ginahambalan,” siling sang Theological Dictionary of the New Testament. Ang tinaga nagapahangop sang mahalungon nga pag-usisa sa isa ka natago nga butang. “May butang nga importante nga luyag makita sang nagatan-aw, bisan pa mabudlay para sa iya nga makita ini kag mahangpan sa gilayon ang kahulugan sini,” sulat sang komentarista sang Biblia nga si R. V. G. Tasker.
Sa amo usisaon mo bala ang imo kaugalingon sa salaming sang Pulong sang Dios kag nian magpahisanto sa ginakinahanglan sini? Si Santiago nagapadayon: “Ini nga tawo, bangod sia nangin, indi malimuton nga manugpamati, kundi manugtuman nga nagabuhat, mangin malipayon sa paghimo niya sini.”—Santiago 1:25.