May mga Anghel Bala sa Tunga Naton?

Kadasig gid sang hitabo. Madalom nga nagapamensaron kag daw walay pangalibutan sa iya palibot, nagaduroy si Marilynn sa riles sang tren. Hingalagan lamang, nakabati sia sing mabaskog nga dinaguldol. Pagtungkaaw niya, namarasmasan niya nga nagatindog gali sia sa banas gid sang nagapadulong nga tren! Naparalisar sa kahadlok, wala makahulag si Marilynn. Tuman na gid kalapit sang tren nga nakita gid niya ang asul nga mga mata kag ginakugmat nga nawong sang enhinyero sang tren. Indi gid malipatan ni Marilynn kon ano ang masunod nga natabo. “Daw subong bala nga may higante sa likod ko nga nagtiklod sa akon,” siling niya. “Nag-alyak ako gikan sa riles kag nagtupa sa abo sang karbon sa higad sang riles.” May diutay lang nga mga lagob, nagtindog si Marilynn agod pasalamatan ang nagluwas sa iya​—⁠apang wala sia sing nakita! Ang iya konklusion? “Ginluwas sang akon anghel dela guardia ang akon kabuhi,” siling ni Marilynn. “Sin-o pa abi?”

ANG isa ka maduhaduhaon nga kalibutan hinali nga nagasalimuang sa mga anghel. Sining karon nga mga tinuig, nangin topiko ang langitnon nga mga persona sa mga palaguwaon sa telebisyon, mga pelikula, kag bisan gani sa mga drama sa Broad­way. Ang mga libro nahanungod sa mga anghel nagapanguna sa listahan sang mabakal nga relihiosong mga balasahon. May yara mga klab, mga seminar, kag mga pamantalaan tuhoy sa anghel. May programa sa pagtudlo nga ginpatok sa pagbulig sa imo​—⁠suno sa isa ka artikulo​—⁠agod “magpabulig sa ‘imo anghel.’ ”

Ang nagahimulos sa makianghel nga kahublagan amo ang oportunista nga mga negosyante nga nagabaligya sing walay katapusan nga kadamuon sang mga produkto. “Mabakal ang bisan ano nga may anghel sa sini,” siling sang isa ka kasosyo sa balaligyaan sa Estados Unidos. Dugang sa madahog nga mga libro, ginalista niya ang “anghel nga mga estatwa, sibit, monyika, T-shirt, poster kag mga greet­ing card”​—⁠tanan nagatipon sing ginatawag sang isa ka dyurnalista nga “langitnon nga mga ganansia.”

Apang indi ini uso lamang, insister sang mga sumalakdag sa anghel. Sa pagsakdag sang ila pangangkon, nagapresentar sila sing nanuhaytuhay nga mga pamatuod​—⁠“natabo gid sa kabuhi” nga mga eksperiensia sa mga anghel. Ang iban nagasiling nga nakakita sila sing anghel sa dagway sang tawo. Ang iban naman nakakita sing kapawa, nakabati sing tingog, nakabatyag sang ila presensia, ukon nakabatyag sing sugyot nga, sa pagpati nila, isa ka sugyot sang anghel. Madamo, kaangay ni Marilynn, ang nagasiling nga ginluwas sang anghel ang ila kabuhi.

Ano ang nagakatabo? “Sa banta ko nagabaskog liwat ang espirituwalidad,” siling ni Joan ­Wester Ander­son, nga nakasulat sing duha ka libro tuhoy sa “labaw sa kinaugali” nga mga ­eksperiensia. Kapin pa ang ginasiling ni Alma Daniel, nga nakabulig sa pagsulat sing isa pa ka libro. Nagasiling sia nga ang mga anghel “may misyon karon nga magpakilala sang ila kaugalingon agod nga kapin kag kapin nga mga tawo ang malab-ot nila. Ang rason kon ngaa masunson naton makita sila amo nga luyag nila ina. Ginahimo nila ini.”

Amo gid bala sini? Ukon may iban pa bala nga kabangdanan sa pagkawili karon sa mga anghel? Agod mahibaluan ini, dapat naton usisaon ang Pulong sang Dios. Ang Biblia nagaunod sing kamatuoran tuhoy sa mga anghel, subong makita pa naton.

[Credit Line sang retrato sa pahina 2]

Pages 3 and 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.