‘Subong nga ang Salsalon Nagapatalom man sang Salsalon’

SANG talipuspusan sang ikatlong siglo C.E., ang isa ka serioso lamharon nga lalaki nga si Anthony, nga ginalaragway subong isa ka “Coptic Christian,” nagpain sa kalibutan kag naghinguyang sing 20 anyos nga nagaisahanon sa desyerto. Ngaa? Ginbatyag niya nga amo ini ang pinakamaayo nga paagi para sa iya sa pag-alagad sa Dios. Pinakauna sia nga impluwensiado nga ermitanyo sang Cristiandad.

Sa karon, ang Cristiandad may pila ka ermitanyo. Apang, dugang kag dugang pa nga mga indibiduwal ang maluyag mag-isahanon sa tuhay nga paagi. Ginalikawan nila ang magpakighambal sa iban tuhoy sa relihion, nagabatyag nga inang paghambalanay nagadul-ong sa mga pagbaisay kag mga pag-inaway. Ang ila pagsimba ginahuman lamang sang indi paghalit sa ila isigkatawo.

Matuod, ang indi paghalit sa isigkatawo bahin sang matuod nga relihion, apang kapin pa ang kinahanglanon. Nagasiling ang dumaan nga hulubaton: ‘Paagi sa salsalon, ang salsalon mismo ginapatalom. Sa amo ang tawo nagapatalom sang nawong sang iya isigkatawo.’ (Hulubaton 27:17) Ang katunayan amo, ginapalig-on sang Biblia ang mga Cristiano nga magtipon sing tingob, indi pagpainon ang ila kaugalingon sing bug-os gikan sa kalibutan ukon gikan sa iban pa nga mga Cristiano. (Juan 17:​14, 15) Nagasiling ini: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob.” (Hebreo 10:​24, 25) Ginasunod sang mga Saksi ni Jehova ina nga laygay. Pila ka beses sa isa ka semana, nagatipon sila sing tingob sa ‘pagpatalom sang nawong sang isa kag isa,’ ginapabakod ang pagtuo sang mga masigkatumuluo. Nasapwan nila nga ang bunayag nga paghambalanay tuhoy sa Biblia wala nagadul-ong sa mga pag-ilinaway. Sa baylo, nagadul-ong ini sa paghiusa ­kag paghidait. Importante ini nga bahin sang matuod nga pagsimba.