Report sang mga Manugbantala sang Ginharian

“Nagasiga Subong mga Sulu sa Kalibutan”

ANG mga Saksi ni Jehova ginakabig subong pinasahi kag sa masami ginapakalain bangod sang ila pagdumili sa pagpatayon sing dugo. Apang, ining panindugan, malig-on nga napasad sa Biblia. Ginapakita sini nga ginapakamalaut sang Dios ang dinagakaigo nga paggamit sing dugo, bangod ang dugo hamili sa iya mga mata. (Genesis 9:​3, 4; Levitico 17:14) Subong resulta sang pag-usisa sa Kasulatan tuhoy sining topiko, nagapati ang mga Saksi ni Jehova nga ang sugo sang Biblia nga ‘maglihi sa dugo’ maathag nga nagalakip sang moderno nga pamaagi sang pagpatayon sing dugo.​—⁠Binuhatan 15:​19, 20, 28, 29.

Sang nagligad nga mga tuig ang mga katapo sang hubon sang mga doktor, subong man ang mga hukmanan sa pila ka mga pungsod, nagsuportar sa mga Saksi ni Jehova tuhoy sa sining isyu. Halimbawa, sa Den­mark ang isa ka lamharon nga iloy nga nakahibalo sang pagtamod sang Biblia tuhoy sa dugo napatay bangod sang isa ka aksidente sa kotse. Bangod sang iya pagpamalibad nga magpatayon sing dugo, gindabukan sang iya mga doktor ang isa ka bulan nga kampanya sang media nga nagapakalain sa mga Saksi ni Jehova.

Nagpangabay sing pagpangusisa ang ginikanan sang lamharon nga babayi, kag sang Abril 1994 ang desisyon ginpahibalo sang Com­mis­sion of Pa­tient’s Com­plaints sang Den­mark. Ginpaathag sini nga ang pasyente napatay, indi bangod sang iya pagpamalibad sing dugo, kundi bangod sang pagpatumbaya sang mga doktor. Ginpasad ang desisyon suno sa mga imbestigasyon sang ­Board of Fo­ren­sic Med­icine kag sang mga awtoridad sang panglawas. Sa isa ka sulat sa tanan nga tagdumalahan sang ikaayong-lawas sa Den­mark, ang Na­tion­al ­Board of ­Health nagsiling nga ang mga doktor may obligasyon sa paghatag sa mga Saksi ni Jehova sang pinakamaayo nga tal-us nga pagbulong, ginahatagan sing konsiderasyon ang ila pagpamalibad sa pagbaton sing dugo.

Ang isa pa ka kaso nagadalahig kay Dan, isa ka 15-anyos nga Saksi nga napatay sa leukemia. Sa sining kaso gintahod sang mga doktor ang maisog nga desisyon ni Dan nga indi magpatayon sing dugo. Nagresulta ini sa lapnag nga kampanya sang media nga ang ginabasol sa kamatayon ni Dan amo ang mga doktor. Walay sapayan, madamo ang wala nagpati sa negatibo nga propaganda.

Halimbawa, ang prinsipal sa eskwelahan ni Dan nagtambong sa pamulongpulong sa lubong sa Kingdom Hall. Nakibot gid sia sa dimakata­runganon nga balita tuhoy sa kamatayon ni Dan. Pagkatapos niya mapakiana sa isa ka Saksi nga kaupod niya sa trabaho ang madamong pamangkot tuhoy sa mga Saksi ni Jehova, ginbaton niya ang kopya sang vi­deo nga Jehovah’s Witnesses​—⁠The Organization Behind the Name. Nakadayaw gid sia sa vi­deo amo nga naghimo sia sing kahimusan nga matan-aw ini sang tanan nga manunudlo sa eskwelahan. Sang ulihi, ginpakita ang vi­deo sa tanan nga estudyante, sa tagsa ka hulot klasehan.

Ang ministro sang panglawas sa Denmark wala man makauyon sa malain nga mga balita tuhoy sa mga doktor ni Dan. Ginpaathag niya nga husto ang ginhimo sang mga doktor bangod sang ila pagtahod sa hamtong nga desisyon kag napasad sing maayo nga pagtuo ni Dan.

Minilyon sang manugbantala sang Ginharian ang nagatuman sa mga kasuguan sang Dios. Bangod sang ila pagkamatinumanon, kilala gid sila, nga “nagasiga subong mga sulu sa kalibutan.”​—⁠Filipos 2:​12, 15.