Ang Paborito ni Irina nga Libro sang Ambahanon

KASAN-O lang, si Irina, isa ka nuebe anyos nga babayi gikan sa So­fia, Bul­gar­ia, ginbawtismuhan subong isa sang mga Saksi ni Jehova. Maluyagon sia magkanta kag nanamian gid sa mga ambahanon sa libro nga Sing Praises to Jehovah. Gani ginhimo ni Irina nga tulumuron ang pagsaulo sing pila ka ambahanon kada bulan.

Ang isa sang paborito nga mga subject ni Irina sa eskwelahan amo ang musika. Gani natingala ang iya manunudlo sa musika sang ginbalibaran ni Irina ang tanyag sa pag-amba sa ­choir sang eskwelahan. Ngaa namalibad si Irina? Narealisar niya nga ang kalabanan sang mga musika nga ipaamba sa iya nagapadungog sa pungsudnon nga mga baganihan kag mga kapiestahan nga may paganong ginhalinan. Ang pila ka mga ambahanon nagasakdag pa gani sing pagrebelde kag kasingki agod itib-ong ang pungsudnon nga mga tulumuron. Indi mahangpan sang manunudlo ang panindugan ni Irina sa sining butang. Ginsulatan ni Irina ang iya manunudlo nga nagasugid sang iya relihioso nga mga pagpati​—⁠apang wala ini magmadinalag-on.

May ideya ang amay ni Irina. Ginhatagan niya ang manunudlo sing isa ka kopya sang libro nga Sing Praises to Jehovah, nga nagaunod sang mga ambahanon nga naluyagan ni Irina nga ambahon. Pila ka adlaw sang ulihi, ginpatawag sang manunudlo si Irina sa hulot-musika. Ginpangabay niya si Irina nga ambahon ang pila sang iya paborito nga mga ambahanon gikan sa libro​—⁠sa atubangan sang iya mga kabutho​—⁠samtang ang manunudlo nagaakompanyar sa iya sa piyano. Ang pag-amba nagdugay sing kapin sa isa ka oras! Dapat akuon sang manunudlo nga ang paborito ni Irina nga libro sang ambahanon may matahom nga mga tono.