“Kinahanglan Ninyo ang Pagbatas”

“KINAHANGLAN [naton] ang pagbatas,” agod ma­baton naton “ang katumanan sang saad.” (Hebreo 10:36) Ginapaathag sang isa ka eskolar sa Biblia nga ang Griegong tinaga nga “pagbatas” nga gingamit ni apostol Pablo sa sining teksto nagalaragway kon kaisa sa “ikasarang sang isa ka tanom nga magkabuhi sa idalom sang mabudlay kag dimaayo nga mga kahimtangan.”

Sa kabukiran sang Europa, may isa ka tanom nga nagatubo kaangay sina. Sing talalupangdon, ginatawag ini nga mabuhi-sing-dayon. Sa pagkamatuod, ining tanom nga al­pine wala nagakabuhi sing dayon, apang nagalawig ini sing madamong tinuig, nagapatubas sing matahom nga mga bulak sa tagsa ka tig-ilinit. Ang The New Encyclopœdia Britannica nagapaathag nga ang tanom gintawag nga mabuhi-sing-dayon bangod sang iya “kabakod kag kahunit.” (Ang sientipiko nga ngalan sining mga tanom sang espesyi nga Sempervivum nagakahulugan man sing “mabuhi-sing-dayon.”)

Nangin talalupangdon ining mahunit nga tanom bangod nagatubo ini sa mabudlay kadtuan nga mga duog. Mahimo ini masalapuan sa ibabaw sang mahangin nga bukid, diin ang temperatura nagalab-ot sa 35°Celsius sa sulod lamang sang 24 oras. Makapanggamot ini sa inutlan sang mga igang nga may diutay nga duta. Ano ang pila sang mga sekreto sang iya pagbatas sa sinang mabudlay nga mga kahimtangan?

Ang mabuhi-sing-dayon nga tanom may madugaon nga mga dahon, nga mahalungon nga nagatipon sing tubig. Nagabulig ini sa iya nga masuyop ang tanan nga tun-og gikan sa ulan ukon sa nagakatunaw nga nieve. Dugang pa, nagapungpong ini amo nga mabakod ini nga nagakapyot sa batuhon nga ginatubuan sini. Bangod nagatubo ini sa mga inutlan, may pangamlig ini batok sa malain nga panahon, bisan nga diutay lamang ang duta. Kon sa aton pa, nagatubo ini paagi sa pagpanginpulos sa iya mabudlay gid nga kahimtangan.

Sa esprituwal nga paghambal, mahimo masapwan naton ang aton kaugalingon sa mga kahimtangan nga nagatilaw sang kalidad sang aton pagbatas. Ano ang makabulig sa aton sa pagbatas sa idalom sang pagtilaw? Kaangay sang mabuhi-sing-dayon nga tanom, mahimo makapundo kita sang nagahatag-kabuhi nga tubig sang Pulong sang Dios kag magpakig-upod sing suod sa matuod nga mga Cristiano para sa pagsakdag kag pangamlig. Labaw sa tanan, kaangay sa mabuhi-sing-dayon nga tanom, dapat kita manguyapot sing hugot sa aton “igang,” nga si Jehova, subong man sa iya Pulong kag sa iya organisayon.​—⁠2 Samuel 22:⁠3.

Sa pagkamatuod, ang mabuhi-sing-dayon nga tanom isa ka matahom nga pahanumdum nga bisan sa idalom sang mabudlay nga kahimtangan, makabatas kita kon panginpuslan naton ang matigayon nga mga aman. Ginapasalig kita ni Jehova nga inang pagbatas makadul-ong sa aton sa ‘pagpanubli sang mga saad,’ nga sing literal nagakahulugan sang dayon nga kabuhi.​—⁠Hebreo 6:​12; Mateo 25:46.