Ang Anay Hukom Nagpangayo sing Pasaylo—Pagkatapos sang 45 ka Tuig
Sang Agosto 1995, sa isa ka hukmanan sa Berlin, ang isa anay ka hukom sang Korte Suprema nagpabutyag sa isa ka Saksi ni Jehova sang iya paghinulsol sa sayop nga iya nahimo 45 ka tuig na ang nagligad.
Sang Oktubre 1950, ang Korte Suprema sang German Democratic Republic (GDR) nagpamatbat sa siam ka Saksi ni Jehova nga nakasala sing pagrebelde kag pagpang-espiya. Duha ang ginsentensiahan sing tubtob buhi nga pagkabilanggo, kag ang nabilin nga pito—lakip ang 22-anyos nga si Lothar Hörnig, ang ikaapat nga ginsumbong gikan sa natuo sa letrato—ginpamatbatan sing malawig nga pagkabilanggo.
Kuarenta ka tuig sang ulihi, ang GDR nangin bahin sang Federal Republic of Germany. Kutob sadto gin-usisa sang mga opisyales ang pila sang mga inhustisya nga nahimo sa anay GDR kag gintinguhaan nga dalhon sa hukmanan yadtong may salabton. Ang isa sinang inhustisya amo ang kasaba sang Korte Suprema tuhoy sa mga Saksi sang 1950.
Si A. T., nga sa karon 80 anyos na, isa sang tatlo ka hukom nga nagpamatbat sang ang siam ka Saksi ginpaatubang sa hukmanan. Ginsumbong karon sang pagpatiko sing hustisya, nag-atubang sia sa Regional Court sa Berlin agod ipaathag ang iya paghukom.
Sa iya panugiron sa korte, ang anay hukom nag-ako nga ginpaboran niya ang isa ka pamatbat nga nakasala mga 45 ka tuig na ang nagligad, walay sapayan nga ginpaboran niya ang mas manubo nga sentensia sangsa ginhatag. Apang ginpahunahuna sia liwat sining bag-o nga kasaba. Ngaa? Ginhingabot sang mga Nazi ang mga Saksi ni Jehova sadtong ikaduhang inaway kalibutanon bangod nagdumili sila sa pagsuporta kay Hitler. Pagkatapos sang inaway ang mga Saksi ginhingabot liwat, sini nga tion sang Komunista nga rehimen. Ginbangdan ini sang “daku nga pag-antos” sang hukom.
Ginsugid ni Lothar Hörnig sa korte nga naghinguyang sia sing lima kag tunga ka tuig sa bilangguan nga nagaisahanon kag nagpabilin sa bilangguan sang Brandenburg tubtob sang 1959. Sang mabatian ang panugiron ni Hörnig, ang anay hukom naghibi. “Ginakasubo ko gid,” nagpilisnguon sia. “Palihug patawara ako.” Ginbaton ni Hörnig ang pagpangayo sing pasaylo.—Ipaanggid ang Lucas 23:34.
[Credit Line sang retrato sa pahina 32]
Neue Berliner Illustrierte