Ginabinagbinag sang mga Espesyalista ang mga Tal-us sa Dugo
HALOS 200 ka espesyalista sa bug-os nga Estados Unidos ang nagsapol sa Cleveland, Ohio, sang Sabado, Oktubre 7, 1995, agod hambalan ang isa ka tema nga labi nga nagapukaw sing interes sa patag sang medisina: ang wala sing dugo nga medisina kag pagbusbos.
Madamong mabudlay nga mga sirkunstansia ang ginhambalan. Halimbawa, ano abi kon ang pasyente may malubha nga anemia (kakulang sing dugo)? Paano mabulong nga wala sing dugo ang isa ka lapsag nga nabun-ag sing tuman kaaga sangsa ginapaabot? Mahimo bala sing madinalag-on ang pagbusbos sa tagipusuon nga wala sing mga pagtayon? Sing makawiwili, ang wala sing dugo nga pagbusbos—masunson nga nagagamit sing mga pamaagi nga nagabulig sa lawas sa pagpauswag sang kaugalingon nga suplay sang dugo sini—ginahimo na sa sining tanan nga mga sitwasyon nga may maayong mga resulta.a
Ngaa kinahanglan ang mga tal-us sa mga pagtayon sing dugo? “Natun-an namon nga ang mga pagtayon sing dugo masunson nga nagaliton sang mga balatian, ilabi na sang hepatitis,” siling ni Sharon Vernon, direktor sang Center for Bloodless Medicine and Surgery sa St. Vincent Charity Hospital sa Cleveland. Sia nagapadayon: “Bisan pa nga ang dugo wala nagaliton sing impeksion ginapakunol sini ang pagbato sang pasyente sa balatian.” Walay sapayan nga ang pagliton sang AIDS nabuhinan paagi sa pag-usisa sing maayo sa dugo, madamo gihapon nga balatian ang indi mamutikan paagi sa sining mga pagtilaw. Kag walay sapayan nga kinahanglan ang daku pa nga paghanda, ang wala sing dugo nga pagbusbos napamatud-an nga mas barato para sa mga ospital, kay ginadula sini ang legal nga mga problema nga mahimo magresulta kon ang mga pasyente makabaton sing mahigko nga dugo.
Para sa mga Saksi ni Jehova, may mas importante pa nga rason sa paglikaw nga gamiton ang dugo: ginadumili ini sang kasuguan sang Dios. (Binuhatan 15:29) Apang, luyag nila makabaton sing pinakamaayong posible medikal nga pagbulong. Busa, nagapakigkooperar sila sa mga doktor nga nagapanguna sa pagpanalawsaw sa wala sing dugo nga medikal nga pagbulong. Indi lamang mga Saksi ni Jehova ang nakapanginpulos sa sini kundi ang madamo pa nga iban nga nabalaka nahanungod sa mga katalagman sang mga pagtayon sa dugo.
[Footnote]
a Tan-awa ang mga guwa sang Awake! sang Nobiembre 22, 1993, pahina 24-7, kag Enero 22, 1996, pahina 31.
[Credit Line sang retrato sa pahina 32]
Retrato ni P. Almasy para sa WHO