Report sang mga Manugbantala sang Ginharian

Paglab-ot sa Tanan nga Sahi Paagi sa Kamatuoran

SI APOSTOL Pablo isa anay ka makugi nga manugbantala sang Ginharian sang Dios. Wala niya gintugutan ang pagpamatok nga mag-upang sa iya komisyon nga ibantala ang “maayong balita.” (1 Corinto 9:16; Binuhatan 13:​50-52) Ginpalig-on ni Pablo ang iban man nga sundon ang iya huwaran.​—⁠1 Corinto 11:⁠1.

Kilala ang mga Saksi ni Jehova sa bug-os nga kalibutan sa ila determinado nga panikasog sa pagbantala. Sa pagkamatuod, nagapakighambal sila sa iban sa “maayo nga panag-on” kag sa “magamo nga panag-on” agod tumanon ang hilikuton nga ginhatag sa ila sang Dios sa ‘paghimo sing mga disipulo.’ (2 Timoteo 4:2; Mateo 28:​19, 20) Bisan sa kadutaan nga ginapamatukan sila, ang bunayag sing tagipusuon nga mga tawo ginalab-ot paagi sa labing importante nga mensahe nahanungod sa Ginharian sang Dios, subong ginapakita sang masunod nga mga eksperiensia.

◻ Sa isa ka isla sa nakatundan sang Pasipiko diin ginadumilian ang hilikuton sang mga Saksi ni Jehova, natalupangdan sang isa ka 12-anyos nga bata nga lalaki nga ginalibutan sia sang malain nga mga kaupod sa eskwelahan. Madamo sang iya mga kabutho ang nagapanigarilyo, nagabasa sing pornograpiko nga mga literatura, nagapanggamo sa mga manunudlo, kag palaaway. Naglain gid ang kahimtangan amo kon ngaa ginpamangkot sang bata nga lalaki ang iya amay kon mahimo sia magsaylo sa iban nga eskwelahan. Apang, nangatarungan ang amay sa iya anak batok sa sining ideya, kay sa pagpati niya pareho lang ang pagginawi sang mga estudyante sa iban nga mga eskwelahan. Apang, paano niya mabuligan ang iya anak?

Nadumduman sang amay nga may libro sila sa balay para sa mga pamatan-on. Regalo ini sang isa ka paryente nga isa sang mga Saksi ni Jehova. Gani ginpangita niya ang libro, kag sang makita niya ini, ginhatag niya ini sa iya anak. Natig-uluhan ini sing Questions Young People Ask​—⁠Answers That Work.a Nasapwan sang bata nga nakabulig gid ang kapitulo nga “How Can I Cope With Peer Pressure?” Wala lamang ini magtudlo sa iya sang importansia nga huptan ang pagtahod sa kaugalingon kundi nagtudlo man ini sa iya kon paano magsiling sing indi sa mataktikanhon nga paagi kon piliton sia sang iban sa pagsunod sa isa ka dimaalamon nga dalanon. Paagi sa pag-aplikar sang Makasulatanhon nga mga prinsipio nga masapwan sa libro, natun-an sining pamatan-on kon paano landason sing madinalag-on ang pag-ipit sang mga katubutubo.

Sang matalupangdan ini kag ang iban pa positibo nga mga pagbag-o sa iya anak, namat-od ang amay nga basahon man ang libro. Nahamuot sa praktikal nga laygay nga masapwan sa libro, nangabay ang amay sa mga Saksi ni Jehova sing isa ka pagtuon sa Biblia sa puluy-an. Sang ulihi, nagbuylog man sa iya sa pagtuon ang iban pa nga mga katapo sang iya pamilya. Ang resulta? Ang bata nga lalaki, ang iya manghod nga lalaki, ang iya amay, kag ang duha ka lolo sang bata nga lalaki, mga Saksi ni Jehova na karon.

◻ Sa amo man nga pungsod, duha ka Saksi ni Jehova ang nabilanggo bangod sang ila bug-os nga pagtuman sa mga prinsipio sang Biblia. Apang, wala nila gintugutan ang ila kahimtangan nga magpahadlok sa ila sa paghambal sing masidla nahanungod sa Ginharian sang Dios. Nagpalapit sila sa isa ka opisyal sang bilangguan kag nakabaton sing pahanugot nga saulugon ang Panihapon sang Ginuo didto. Malipayon gid sila sang 14 ka bilanggo ang nagpakita sing interes sa Biblia kag nagbuylog sa mga Saksi para sa sining importante nga okasyon! Sang makaguwa na sila sa bilangguan, ang iban sa mga bilanggo nagpadayon sa pagtuon sa Biblia kag nakig-upod sa mga Saksi ni Jehova.

Sa kapin sa 25 ka pungsod, ang mga Saksi ni Jehova nagaantos bangod sang mga pagdumili ukon nanuhaytuhay nga porma sang pagpamatok ukon paghingabot. Apang, kaangay sang mga apostoles, sila nagapadayon nga “walay untat sa pagpanudlo kag sa pagpahayag sing maayong balita nahanungod kay Cristo, nga si Jesus.”​—⁠Binuhatan 5:⁠42.

[Footnote]