Sin-o ang Nagagahom?
“SIN-O ang nagagahom sa kalibutan?” Kon may mamangkot sa imo sinang pamangkot, ano ang imo isabat? Ang kalabanan relihioso nga tawo mahimo magsiling nga amo “ang Dios” ukon “si Jesus.” Ang isa ka artikulo nga mabasa sa The Freeport News, isa ka pamantalaan sa Bahamas, naghatag sing sabat nga wala ginpaabot.
“Nakakita ako sing isa ka tract sa akon ganhaan,” siling sang manunulat sang artikulo. “Masami nga wala ko ginabasa ang mga balasahon nga ginabilin sa akon ganhaan, apang sini nga tion namat-od ako nga basahon ini. Ang tig-ulo nagapamangkot, ‘Sin-o Gid ang Nagagahom sa Kalibutan?’ ” Paagi sa pagbasa sing pasad sa Biblia nga tract, natun-an sining babayi nga ang manuggahom sining kalibutan indi ang Dios ukon si Jesus kundi si Satanas nga Yawa.—Juan 12:31; 14:30; 16:11; 1 Juan 5:19.
“Binagbinaga ang sobra nga pagkawalay balatyagon sa dimapatihan nga kapintas,” paathag sang tract. “Ang mga tawo nagagamit sing mga gas chamber, mga kampo konsentrasyon, mga flamethrower, napalm nga mga bomba, kag iban pa sobra kalain nga mga paagi sa pagpaantos kag walay kaluoy nga pagpatyanay sa isa kag isa. . . . Anong mga puwersa ang nagatiklod sa mga tawo sa sinang makangilil-ad nga mga buhat ukon nagamaniobra sa ila sa mga kahimtangan diin nagabatyag sila nga napilitan sa paghimo sing malain? Napamangkot mo na ayhan kon bala ang pila ka malaut, dikitaon nga gahom nagaimpluwensia sa mga tawo sa paghimo sinang masingki nga mga buhat?” Makapakibot bala nga ginatawag sang Biblia si Satanas nga “ang dios sining sistema sang mga butang”?—2 Corinto 4:4.
Sing makalilipay, malapit na ang tion nga si Satanas kag ang iya mga demonyo wala na. “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:17) Huo, ang Biblia nagasaad nga ang mga nagahimo sang kabubut-on sang Dios may paglaum nga mabuhi sing dayon sa isa ka matarong nga bag-ong kalibutan. (Salmo 37:9-11; 2 Pedro 3:13; Bugna 21:3, 4) Daw ano nga kaumpawan nga madula ang malaut nga impluwensia ni Satanas kag sang iya mga demonyo!
Sa tapos masumaryo ang kaundan sining magamay nga tract, ang manunulat sang artikulo sa The Freeport News naghinakop: “Nalipay gid ako nga ginbasa ko ang tract . . . bangod nagapalibog man ako tuhoy sa kahimtangan sang kalibutan, kag kon sin-o ang nagagahom sa sini.”