‘Sa Dios Ako Magadangop’
SA SINING “makahalanguyos nga mga tion nga mabudlay pakigbagayan,” ang mga pagsulay kag mga pag-ipit padayon nga nagadugang. Ang aton pagkabunayag, halimbawa, mahimo tilawan sa ulubrahan. Ang aton pagkaputli mahimo tilawan sang mga kabutho. Kag ang aton integridad masunson nga ginatilawan sang malain sing moral nga kalibutan.—2 Timoteo 3:1-5.
Ang manunulat sang Biblia nga si Asap nagkabuhi man sadto sang panahon nga ang kalautan bugana. Ginpabugal pa gani sang pila sang iya mga katubotubo ang ila didiosnon nga paggawi. “Ang bugal subong sang kulintas sa ila liog,” sulat ni Asap. “Ang kasingki nagaputos sa ila subong sang panapton. Nagayubit sila kag nagahambal sing malain; nagapamulong sila sing matinaastaason tuhoy sa daya.” (Salmo 73:6, 8) Daw pamilyar bala ini nga panimuot?
Para sa mga maluyag sa paghimo sing husto, ini nga paggawi makapulung-aw gid, makapaluya pa gani. “Ginasit-an ako sa bug-os nga adlaw,” panalabiton ni Asap. “Kahul-anan ini sa akon mga mata.” (Salmo 73:14, 16) Mahimo nga amo man ang batyagon mo, apang indi maluyahan sing buot! Nadaug ni Asap ang kalautan sang panahon niya, kag madaug mo man ini. Apang paano?
Narealisar ni Asap nga halos imposible makita ang matuod nga katarungan sa idalom sang di-himpit nga pagginahom sang tawo. (Salmo 146:3, 4; Hulubaton 17:23) Gani sa baylo nga uyangan ang iya hamili nga tion, enerhiya, kag manggad sa pagpanikasog nga madula ang tanan nga kalautan sa palibot niya, nagkonsentrar sia sa iya kaangtanan upod sa Dios. Si Asap nagsiling: “Para sa akon, ang pagpalapit sa Dios maayo sa akon. Ginhimo ko nga akon dalangpan ang Soberanong Ginuo nga si Jehova.”—Salmo 73:28.
Karon, ang mga nagabuhat sing malain nga mga batasan sa negosyo masunson nga nagaagom sing materyal nga mga bentaha. Madamo pa gani ang magapabugal sang ila di-pagsapak sa mga kasuguan sang Dios sa moralidad. Apang indi sila magasanyog sa walay katubtuban. “Sa pagkamatuod ginapahamtang mo sila sa madanlog nga mga duog,” siling ni Asap. “Ginahulog mo sila sa kalaglagan.”—Salmo 73:18.
Huo, sa gintalana nga tion sang Dios, ang pangdaya, kasingki, kag kalautan, subong man ang tanan iban pa nga didiosnon nga mga buhat nga dapat likawan sang matuod nga mga Cristiano, pagadulaon. Ang Biblia nagasaad: “Kay utdon sang Dios ang mga nagahimo sing malaut, apang ang mga nagahulat kay Jehova amo ang magapanubli sang duta.” (Salmo 37:9) Sa amo man nga tion, kabay nga ipalanog naton ang pinamulong sang salmista nga nagsiling: “Si Jehova amo ang akon igang kag ang akon kuta kag ang Manug-aman sing palalagyuhan para sa akon. Ang akon Dios amo ang akon igang. Sa iya magadangop ako.”—Salmo 18:2.