Nagtindog Sila nga Malig-on Walay Sapayan sang Paghingabot sang mga Nazi

ANG walay kahadlok nga integridad sang mga Saksi ni Jehova sa Nazi nga Alemanya tumalagsahon gid kon ipaanggid sa panindugan nga ginhimo sang mga simbahan sang Cristiandad. Ginpatalupangod ini sang propesor sang maragtas nga si John Weiss sa iya libro nga Ideology of Death. Sia nagsulat:

“Sang 1934 ang Evangelical nga simbahan nag-insister nga ang mga Nazi dapat ‘abiabihon sang mga Lutheran,’ kag nagpasalamat sa ‘Ginuong Dios’ tungod sa paghatag sa mga Aleman sing ‘relihioso kag masaligan nga ginuo.’ . . . Isa ka Protestante nga obispo ang nagsulat sa iya klero, ‘[Si Hitler] ginpadala sang Dios sa aton.’ ” Si Weiss nagpadayon: “Ang Aleman nga Metodista nga simbahan . . . nag-ugyon kay Obispo Dibelius nga ginluwas ni Hitler ang Alemanya gikan sa magaabot nga Bolshevik nga rebolusyon, nga nagdala sing paghidait kag kalig-unan . . . Ang Mormon nga simbahan naglaygay sa mga sumulunod sini nga ang pagpamatok kay Hitler isa ka paglapas sa kasuguan sang Mormon.” Kag sia nagadugang: “Ang mga Katoliko ginsilingan nga isa ka sagrado nga katungdanan nga tumanon ang bag-ong estado, isa ka katungdanan nga wala gid madula bisan pagkatapos nga mahibaluan sang mga klero ang tanan nga makasiligni nga mga butang sa sidlangan.”

Apang kamusta ang mga Saksi ni Jehova? Ginpakita ni Propesor Weiss nga “subong isa ka grupo, ang mga Saksi ni Jehova lamang ang nagpamatok sa mga Nazi.” Linibo sa ila ang ginbilanggo, padayon ni Propesor Weiss, “apang ang bisan sin-o nga Saksi nga ginpadala sa kampo konsentrasyon mahimo kuntani nga nahilway paagi lamang sa pagpirma sa isa ka papeles nga nagasikway sang iya relihion.”

Nahanungod sa integridad sang mga Saksi ni Jehova, si Propesor Weiss nagakomento: “Ang ila halimbawa nagailustrar sang tumalagsahon gid nga kalig-on kag maisugon nga impluwensia sang dumaan nga Cristianismo antes ini mangin isa ka institusyon kag nga ang obligasyon sa sosiedad nagalabaw sa handum nga magkabuhi nga may integridad. Subong sang ginsulat sang isa ka Protestante nga pastor tuhoy sa ila, ‘Indi ang dalagku nga mga simbahan, kundi ining ginpasipalahan kag ginyaguta nga katawhan ang nagtindog una batok sa kasingkal sang kaalipungot sang mga Nazi, kag maisugon nga namatok suno sa ila pagtuo.’ ”