Isa Ka Suga nga Magatuytoy sa Imo sa Banas sang Kabuhi
“NAHIBALUAN ko, O Jehova, nga wala sa tawo ang iya dalanon. Wala sa tawo nga nagalakat ang pagmando sang iya mga tikang.” (Jeremias 10:23) Paagi sa sining mga pulong ginpakita ni manalagna Jeremias nga ang mga tawo indi magmadinalag-on sa paglakat sa banas sang kabuhi nga wala sing bulig. Diin masapwan ina nga bulig? Ang salmista nagasabat sa iya pangamuyo kay Jehova nga Dios: “Ang imo pulong suga sa akon tiil, kag kapawa sa akon banas.”—Salmo 119:105.
Ang mga nagatuon sing Pulong sang Dios, ang Balaan nga Biblia, kag nagatuman sa ginasiling sini mangin kaangay sa isa nga nagsugod sa paglakbay sa kaagahon. Sang primero, indi sia maayo makakita bangod madulom pa. Apang samtang nagabutlak ang adlaw, madamo na sia sing makita. Sang ulihi, nagasilak ang adlaw sing direkta sa ibabaw niya. Makita na niya ang tanan nga butang sing maathag. Ginapahanumdom sining ilustrasyon ang isa ka hulubaton sa Biblia: ‘Ang banas sang mga matarong kaangay sa masanag nga kapawa nga nagasanag sing labi kag labi tubtob nga adlawon na.’—Hulubaton 4:18.
Kamusta naman yadtong nagasikway sa panuytoy sang Dios? Ang Biblia nagasiling: “Ang dalanon sang mga malauton kaangay sa kadudulman; wala nila mahibaluan ang ila nasandaran.” (Hulubaton 4:19) Huo, ang malauton kaangay sa tawo nga nagakasandad sa kadudulman. Bisan ang daw kadalag-an nila umalagi lamang, kay “wala sing kaalam, ukon paghantop, ukon laygay batok kay Jehova.”—Hulubaton 21:30.
Busa, sunda ang panuytoy sang Pulong sang Dios, ang Biblia. Kon himuon mo ini, masapwan mo nga matuod ang mga pinamulong sa Hulubaton 3:5, 6: “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop. Sa tanan mo nga dalanon talupangda sia, kag sia mismo magatadlong sang imo mga banas.”