Kay Sin-o mga Saad ang Imo Masaligan?
SANG 1893 isa ka grupo sang 74 ka komentarista sa sosiedad ang nagsapol sa Chicago World’s Fair agod hinun-anunan ang palaabuton. [Ang lugar sini makita sa ibabaw.] Nagatan-aw sing 100 ka tuig sa unahan tubtob sa 1993, naghimo sila sing masunod nga mga pakot lakip sa iban pa: “Madamong tawo ang mabuhi sing 150.” “Ang mga prisuhan buhinan kag ang diborsio indi na kinahanglan nga binagbinagon.” “Ang gobierno mangin mas simple, kay ang daku nga kabantugan pirme nahuyog padulong sa pagkasimple.”
Sa kaanggid, sang 1967 ang libro nga natig-uluhan The Year 2000 nagpakot: “Sa tuig 2000, matupungan, mailog, ukon malabawan sang kompyuter ang kalabanan nga ‘kaangay-tawo’ nga ikasarang sa hunahuna sang pila ka tawo, lakip na ayhan ang pila sang iya mga ikasarang sa taliambong kag pagkamatukibon.” “Ang ideya tuhoy sa manubo sing bili nga mga robot nga nagahimo sang kalabanan nga hilikuton sa balay . . . labing rasonable sa tuig 2000.”
Ang pagkawalay ikasarang sang tawo nga mapaktan ang palaabuton nga mga hitabo kabaliskaran gid sa ikasarang sang Dios. Halimbawa, ipaanggid ang nasambit na nga mga pakot sa gintagna sang Biblia sang halos 20 ka siglo na ang nagligad may kaangtanan sa aton adlaw: “Ang mga tawo mangin mga mahigugmaon sang kaugalingon, mga mahigugmaon sang kuwarta, mga bugalon, mga palabilabihon, mga mapasipalahon, mga malalison sa mga ginikanan, mga dimapinasalamaton, mga dimatutom, mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan, mga maluib, mga matig-a sing ulo, mga nagahabok sa pagpadayaw, mga mahigugmaon sa kinasadya sa baylo sang sa Dios, nga may dagway sang diosnon nga debosyon apang nagapanghiwala sang gahom sini.”—2 Timoteo 3:1-5.
Ining tagna sang Biblia nahanungod sa “katapusan nga mga adlaw” isa lamang sang madamo nga natuman sa aton adlaw. Ang Pulong sang Dios nagtagna nga ang “tanda” sang presensia ni Jesus magalakip sang inaway kalibutanon, mga kakulang sing pagkaon, mga pamiste, mga linog, kag bug-os kalibutan nga pagbantala sing maayong balita sang Ginharian sang Dios.—Mateo 24:3-14; Lucas 21:11.
Ang walay pagsayop nga pagkasibu sang mga saad sang Dios nagpahulag sa isa ka manunulat sang Biblia nga magsiling sang nagligad nga mga siglo: “Wala sing isa ka butang nga nakulang sa tanan nga butang nga maayo nga ginpamulong nahanungod sa inyo ni Jehova nga inyo Dios. Ang tanan nahanabo sa inyo. Wala sing isa ka butang nga nakulang sa inyo.”—Josue 23:14.
Huo, makasalig kita nga ang tanan nga saad sang Dios matuman sa dili madugay. Dulaon sang Ginharian sang Dios ang balatian, krimen, pagkagiyan sa droga, gutom, kag inaway—ang bug-os nga duta mangin isa ka paraiso. (Salmo 37:10, 11, 29; Bugna 21:3, 4) Masaligan ninyo ang katumanan sining tagna! Magahalin ini sa aton Manunuga, “nga indi makabutig.”—Tito 1:2; ipaanggid ang Hebreo 6:13-19.
[Picture Credit Line sa pahina 32]
Cleveland State University Archive