Report sang mga Manugbantala sang Ginharian

Ginadayaw sang mga Lamharon ang Dios sa Demokratiko nga Republika sang Congo

SINIGLO na ang nagligad, mainit nga gin-agda sang salmista ang mga lamharon nga magbuylog sa pagdayaw sa Hari sang walay katubtuban: “Kamo nga mga pamatan-on nga lalaki kag kamo nga mga ulay, kamo nga tigulang nga mga lalaki upod sa mga bata nga lalaki . . . , dayawa ang ngalan ni Jehova, kay ang iya lamang ngalan ang labing mataas.” (Salmo 148:​12, 13) Ginapadaku sang masunod nga mga eksperiensia gikan sa Demokratiko nga Republika sang Congo ining dimapaanggid nga pribilehiyo.

• Nahamuot gid ang tag-iya sang balay nga ginadayunan sang isa ka espesyal payunir sa paggawi sang mga Saksi ni Jehova. Busa gintugutan niya ang mga Saksi nga tun-an sa Biblia ang singko anyos niya nga anak nga babayi, nga si Fifi. Sa tapos makita ang pag-uswag ni Fifi sa pagtuon sa Ang Akon Libro sang mga Sugilanon sa Biblia,a gintugutan sia sang iya amay nga magtambong sa mga miting sa Kingdom Hall. Didto, natun-an sang bata nga si Fifi ang mga ambahanon sa Ginharian gikan sa songbook sang mga Saksi. Naluyagan gid niya ang ambahanon numero 4, nga natig-uluhan “God’s Promise of Paradise.”

Isa ka adlaw namat-od ang amay ni Fifi nga iupod sia sa iya simbahan. Sa kakibot sang tanan, wala mag-amba si Fifi sing mga ambahanon sang simbahan. Ngaa? Bangod nabatyagan niya nga ang mga ambahanon nga ginakanta sa simbahan sang iya amay wala nahisanto sa kon ano ang iya natun-an sa Biblia. Sa baylo, maisugon nga gin-amba niya ang iya paborito nga ambahanon sa Ginharian.

Sa tapos sang pila ka wala magmadinalag-on nga paninguha nga bag-uhon ang iya panghunahuna, namat-od ang mga lider sang simbahan nga sikwayon ang singko anyos nga si Fifi! Walay sapayan sining malain nga pagtratar, nagpabilin nga kalma ang iya amay. Nalipay sia nga nagpabilin nga malig-on si Fifi sa iya ginapatihan. Luyag sang amay kag iloy ni Fifi nga magpadayon sia sa pagpakig-upod sa mga Saksi ni Jehova.

• Sang namat-od nga magtuon sa Biblia upod sa mga Saksi ni Jehova ang lamharon nga bata nga lalaki nga si Lukodi, namatok gid ang iya amay. Isa ka tion samtang nagahanda si Lukodi sa pagtambong sa isa ka miting sa Kingdom Hall, ginpahog sia sing espading sang iya amay. Sa isa pa ka tion ginhanot sang lipak si Lukodi sang iya amay, nga nagtuga sing madalom nga pilas sa iya likod. Walay sapayan sang grabe nga pagpamatok, nagpabilin nga malig-on si Lukodi sa iya pamat-od nga mangin isa sang mga Saksi ni Jehova. Nagpadayon sia sa pag-uswag kag nabawtismuhan. Nagaalagad sia karon subong isa ka regular payunir.

Si Sona, ang manghod nga babayi ni Lukodi, nakadayaw gid sa panindugan sang iya utod amo nga nagsugod man sia sa pagtuon sa Biblia upod sa mga Saksi ni Jehova. Apang, agod punggan sia sa pagtuon, ginpaeskwela si Sona sang iya amay sa pihak nga minuro, nga wala sing mga Saksi. Walay sapayan, ginhimo nga batasan ni Sona nga isugid sa iban ang mga butang nga iya natun-an. Subong resulta, nangin interesado man ang iya pakaisa nga babayi.

Sang mabatian sang mga Saksi gikan sa kaingod nga minuro ang tuhoy sa pagbantala ni Sona, ginduaw nila sia kag ginhimos ang isa ka regular nga pagtuon sa Biblia sa puluy-an upod sa iya. Padayon sia nga nag-uswag kag sang ulihi nagbuylog sia sa iya utod subong isa ka dedikado, bawtismado nga Saksi ni Jehova. Dugang pa, ang iya pakaisa nga babayi isa na karon ka dibawtismado nga manugbantala, kag ginahiwat ang isa ka pagtinuon sa libro sa sini nga minuro.

Daw ano ka makalilipay kag makapalig-on kon ang mga lamharon magbuylog sa pagdayaw sa ngalan ni Jehova!

[Footnote]