Ang mga Doktor, mga Hukom, kag ang mga Saksi ni Jehova

SADTONG Marso 1995, ang mga Saksi ni Jehova naghiwat sing duha ka seminar sa Brazil. Ang katuyuan sini? Agod matigayon ang kooperasyon sang mga manugbulong kag sang husgado kon maospital ang isa sang mga Saksi ni Jehova kag indi magbaton sing pagpatayon sing dugo.​—⁠Binuhatan 15:⁠29.

Sing makapasubo, sa pila ka kaso wala ginsapak sang mga doktor ang pangabay sang Saksi nga mga pasyente kag nagkuha sing mando sa korte agod ipilit ang pagtayon sing dugo. Sa sini nga mga kahimtangan gingamit sang mga Saksi ang bisan anong legal nga mga paagi nga matigayon agod pangapinan ang ila kaugalingon. Apang, mas luyag nila ang kooperasyon sangsa komprontasyon. Sa amo, ginpadaku sang mga seminar nga may madamo nga tal-us sa homologous nga pagtayon sing dugo nga terapiya kag malipayon nga ginabaton ini sang mga Saksi ni Jehova.⁠a

Ang isa ka miting sang Regional Council of Medicine sa Sao Paulo nagasuporta na sa panindugan sang mga Saksi. Sang Enero 1995 namat-od ini nga kon may mamatok sa ginarekomendar nga pagbulong sang isa ka doktor, may kinamatarong ang pasyente nga balibaran ini kag magkuha sang lain nga doktor.

Sing makalilipay, may ginatos na karon ka manugbulong sa Brazil ang handa nga magpadapat sing wala sing dugo nga pagbulong sa ila mga pasyente nga nagapangabay sini. Kutob sadtong mga seminar nga ginhiwat sang Marso 1995, ang kooperasyon sa ulot sang mga doktor, mga hukom, kag mga Saksi ni Jehova sa Brazil nag-uswag sing daku. Sang 1997 ang medikal nga magasin sa Brazil nga Âmbito Hospitalar nagbalhag sing isa ka artikulo nga nag-insister tuhoy sa mga kinamatarong sang mga Saksi ni Jehova nga tahuron ang ila panindugan tuhoy sa isyu sang dugo. Lapnag na karon nga ginakilala, subong sang ginsiling sang Regional Councils of Medicine para sa mga estado sang Rio de Janeiro kag Saõ Paulo nga, “ang katungdanan sang doktor sa pag-amlig sa kabuhi sang pasyente indi dapat mangibabaw sa iya katungdanan nga pangapinan ang kinamatarong sang pasyente sa pagpili sing sahi sang pagbulong.”

[Footnote]