Gindayaw ang Isa ka “Pinasahi” nga Kombension

ANG isa ka manugwaragwag sa radyo sa Lima, Peru, may mga pangduhaduha tuhoy sa mga Saksi ni Jehova. Apang, sa tapos makatambong sa isa sang ila distrito nga mga kombension, nagbag-o sing daku ang iya panimuot. Sa katunayan, nagdayaw gid sia amo nga naghatag sia sing maayo nga komento sa iya mga tagpalamati sa radyo. Ang masunod amo ang mga bahin sang iya ginsiling:

“Ang kombension pinasahi gid. Wala sing bisan isa ka papel sa salog ukon mga manugbaligya sa palibot. Wala sing paggilinutok sa trapiko. Lima ka libo kag duha ka gatos ka tawo ang nagkadto sa istadyum sa ila kaugalingon nga gasto, ang kada isa nagadala sing balde, trapo, duster, dustpan, silhig, brutsa, guwantes, kag habon para sa paghugas kag pagkuskos sa amo nga duog. Kon may pilintahan, ginapintahan nila ini. Kag sa diin naghalin ang kuwarta? Halin sa ila mismo! Kon ginapahibalo sila tuhoy sa mga butang nga kinahanglan obrahon, tanan sila handa maghatag sang ila kuwarta. Ginasiling ko sa inyo, ang Katoliko nga Simbahan nagakatulog kon tuhoy sa sining mga butang. Ginapanginbulahan ko ang mga Saksi ni Jehova kag ang mga manughituhog sini nga okasyon. Kag luyag ko isiling sa ila sing tinagipusuon, Kabay nga buligan kamo kag pakamaayuhon sang Dios.”

Sa mga siudad sa bug-os nga kalibutan sini nga tuig, ang mga Saksi ni Jehova magahiwat sing “Ang Diosnon nga Dalanon Sang Kabuhi” Distrito nga Kombension. Magatambong ka bala?

[Blurb sa pahina 32]

“Wala sing bisan isa ka papel sa salog”