Ang Maayo nga Pagginawi Nagadala sing Kadayawan

Gindayaw sang pamantalaan sa Italya nga La Gazzetta del Mezzogiorno ang mga Saksi ni Jehova tungod sang pagbalhag sing artikulo nga “Matera​—⁠City of Unique Cave Dwellings.” Ining artikulo mabasa sa Hulyo 8, 1997, nga guwa sang Awake! nga magasin, nga may lapnag nga sirkulasyon sa madamo nga lenguahe. Ang Awake! ginabadbad karon sa 81 ka lenguahe kag may sirkulasyon nga kapin sa 19 milyones sa bug-os nga kalibutan. Nagsiling ang pamantalaan nga ang Awake! nakahimo sing rekord “sining tig-ilinit kon tuhoy sa kampanya sa pagpalapnag agod itib-ong ang maragtason kag artistiko nga panublion sang siudad [sang Matera].”

Gindayaw sang pamantalaan ang mga Saksi may kaangtanan sa “Pagtuo sa Pulong Sang Dios” Distrito nga Kombension nga ginhiwat sa Matera sang 1997. Ginsiling sang artikulo nga nahimo sang mga Saksi “nga tipunon ang 4,000 ka tawo sa XXI Settembre Stadium [sang siudad] sa tungatunga nga bahin sang tig-ilinit sa idalom sang nagatagiti nga adlaw; nagpaninlo sila, nagpamintura, kag ginpauswag ang mga pasilidad sining istadyum (ilabi na ang kasilyas) nga wala gid sing bayad, ginbayaran nila mismo ang mga kagastuhanan sa pagbakal sing kinahanglanon nga materyales.”

Ginatinguhaan sang mga Saksi ni Jehova nga mangin maayo nga mga isigkatawo. (Mateo 22:​37-​39) Ginasunod man nila ang Makasulatanhon nga laygay: “Hupti ang inyo maayo nga pagginawi sa tunga sang mga pungsod, agod . . . sila subong resulta sang inyo maayong binuhatan nga ila nasaksihan magahimaya sa Dios sa adlaw sang iya pag-usisa.”​—⁠1 Pedro 2:⁠12.