Ang Inaway nga Naglaglag sang Ika-19 nga Siglo

1914

GINAHUNAHUNA ang bag-o nga milenyo, si Charley Reese, kolumnista sa pamantalaan nga The Orlando Sentinel, nagsulat: “Ang inaway sang 1914-18 nga naglaglag sang ika-19 nga siglo wala pa matapos.” Ano ang iya buot silingon? Sia nagpaathag: “Ang maragtas wala ginakontrol sang mga petsa. Ang ika-19 nga siglo—ginlaragway nga isa ka grupo sang mga pagpati, mga paghaumhaom, mga panimuot kag moralidad—wala matapos sang Enero 1, 1901. Natapos ini sang 1914. Amo man sina ang paglaragway sa ika-20 nga siglo sang magsugod ini. . . .

“Ang halos tanan nga binangig nga ginkabalak-an naton sa bilog naton nga kabuhi nagsugod sa sadto nga inaway. Halos ang tanan nga kaalam kag huyog sang kultura nga aton ginasunod naghalin sa sadto nga inaway. . . .

“Mahimo nga nakatuga yadto sing halit bangod ginguba sini ang pagpati sang mga tawo nga makontrol sang tawo ang iya kapalaran. . . . Bangod sang inaway ginsikway sang tawo yadtong sayop nga pagpati. Wala ginpaabot sang magtimbang nga bahin sa inaway nga amo sini ang mangin resulta. Ginlaglag sini ang emperyo sang Britanya kag Pransia. Ginpatay sini ang pinakaali nga mga lalaki sa bug-os nga kaliwatan sang Britanya, Pransia, kag Alemanya. . . . Sa malip-ot nga tion, nagpatay ini sing 11 milyones ka tawo.”

Sa sulod sang kapin sa 120 ka tuig, ginatudlo sang mga Saksi ni Jehova ang 1914 subong ang katapusan sang gintawag ni Jesus nga “ang gintalana nga tion sang mga pungsod.” (Lucas 21:24) Sadto nga tuig, ang ginbanhaw kag ginhimaya nga si Jesucristo gintangdo subong Hari sang langitnon nga Ginharian. Paagi sa sina nga Ginharian, dulaon sing dayon ni Jehova nga Dios ang tanan nga pag-antos nga nangin kinaandan sa sini nga siglo.—Salmo 37:10, 11; Manugwali 8:9; Bugna 21:3, 4.

[Picture Credit Line sa pahina 32]

Retrato sang U.S. National Archives