“Kamo ang Nakatuman sang Ginapaabot sang Dios sa Aton”
SA PAGKOOPERAR sa sekular nga mga awtoridad “tungod sa Ginuo,” sarang mapaabot sang mga Cristiano nga “dayawon [subong] manughimo sing maayo.” (1 Pedro 2:13-15) Naeksperiensiahan ini kasan-o lang sang mga Saksi ni Jehova sa Bagatnan nga Aprika sa isa ka distrito nga kombension nga ginhiwat nila sa isa ka tinukod sang eskwelahan sa kolehiyo.
Sa una nga adlaw sang kombension, naghanda ang mga guardia sang kolehiyo sa masami nga kadamuon sang mainiton kag wala nagakooperar nga mga delegado, subong sang ila naeksperiensiahan sa iban nga sahi sang mga kombension. Apang, bangod wala pa gid sila anay makapakig-angot sa mga Saksi ni Jehova, nasorpresa gid sila!
Subong bahin sang ila regular nga mga pag-usisa para sa seguridad sa mga gawang, ginausisa sang guardia ang salakyan nga nagasulod kag nagaguwa sa amo nga duog. Nakibot sila sa ginpakita nga pagkamainabyanon, pagpailob, kag pagtahod, bisan pa nga ang pagrekesa nagpaatrasar sa mga delegado. Wala ang masami nagakatabo nga pagbato, pagbinaisay, kag pamuyayaw. “Indi katulad sang iban nga mga bisita,” siling sang isa ka guardia, “ginapakita ninyo ang mapainubuson nga espiritu kag dignidad nga makita namon tanan.”
Sang nahibaluan sang hepe sang mga guardia nga nagakooperar ang mga Saksi ni Jehova, namat-od sia nga indi na kinahanglan nga usisaon ang mga salakyan “bangod,” siling niya, “disiplinado gid kamo kaayo.” Sang ulihi, ang mga salakyan nga may tiket sa parking nga “JW” ginapasulod na nga wala ginausisa.
Sa katapusan sang kombension, nagsiling ang hepe sang mga guardia nga nagalaum sia nga makita liwat ang mga Saksi sa indi madugay. “Wala pa gid kami makakita sing kaangay sina ka but-anan nga katawhan,” siling niya. “Kamo ang nagatuman sang ginapaabot sang Dios sa aton.” Ina nga komendasyon dugang pa nga nagpalig-on sa matuod nga mga Cristiano nga ‘maghupot sing maayong paggawi,’ agod ‘mahimaya [sang katawhan] ang Dios subong resulta sang maayong mga buhat nga nasaksihan nila.’—1 Pedro 2:12.