Report sang mga Manugbantala sang Ginharian

Teokratikong Pag-uswag sa Namibia

UNA nga nakalab-ot sa Namibia ang maayong balita sang Ginharian sang Dios sang talipuspusan sang dekada 1920. Sugod sadto, ginatos sang bunayag-sing-tagipusuon nga mga tawo ang nagbaton sing mensahe sang Dios sa kaluwasan. Ginapakita sang masunod nga mga eksperiensia kon paano ginatipon ni Jehova ining mga kalahamut-an sa iya panong.—Hageo 2:7.

◻ Si Paulus, isa ka hawot-hawot nga mangunguma nga nagapuyo sa naaminhan-nasidlangan sang Namibia, una nga napakig-angutan sang mga Saksi ni Jehova sang nagduaw sia sa Windhoek, ang kapital nga siudad. Kumbinsido dayon si Paulus nga nasalapuan na niya ang kamatuoran. Nagpauli sia dala ang libro nga Mahimu Ka Mabuhi sing Dayon sa Paraiso sa Duta. Nian, sang nagbiyahe pakadto sa Rundu, ang pinakamalapit nga banwa nga may Kingdom Hall, nakita ni Paulus ang mga Saksi kag nagpakitluoy nga duawon sia.

Apang, tuman kalayo para sa mga Saksi nga magkadto kag maghiwat sing semanal nga pagtuon sa Biblia kay Paulus. Wala malingkang, gintun-an ni Paulus sing isahanon ang Biblia. Dugang pa, makugi sia nga nagbantala sa iban tuhoy sa mga butang nga iya natun-an. Sang ulihi, natukod ang isa ka grupo sang pagtuon sa Biblia. Sang nabatian sa radyo sang diutay nga grupo nga isa ka asambleya sang mga Saksi ni Jehova ang hiwaton sa Rundu, ginsipot nila ang ila diutay nga kinitaan kag nangita sing transportasyon sa pagtambong.

Daw ano ka makalilipay nga eksperiensia para sa ila nga makapakig-upod sa mga Saksi ni Jehova sa nahauna nga tion! Ginhimo dayon ang mga kahimusan para sa kalipikado nga mga utod nga lalaki sa pagduaw sini nga grupo sing regular. Sa karon, may anom ka manugbantala sa minuro nga ginapuy-an ni Paulus.

◻ Ang interes ni Johanna sa ngalan sang Dios nagdabdab sang nabatian niya nga ginapakalain sang isa ang mga Saksi ni Jehova. Sia naghinumdom: “Sang una ko nga nabatian ang ngalan nga Jehova, indi ini mapanas sa akon hunahuna, kag nagpalibog ako kon sin-o si Jehova. Nagapuyo kami sang akon bana malapit sa Walvis Bay sa baybayon sang Namibia. Sang isa ka bes nagkadto kami sa banwa, kag nakita ko ang pila ka Saksi nga nagapanagtag sing Lalantawan nga magasin sa dalan. Nagkuha ako sing isa ka kopya kag nagpangabay sing isa ka pagtuon sa Biblia, bangod madamo ako sing pamangkot. Naghibi ako sang ginhambalan nila ako nga indi sila makakadto bangod naguba ang ila salakyan. Wala madugay pagkatapos sadto napatay ang akon bana, kag nagpuyo ako sa Keetmanshoop. Isa ka espesyal payunir (bug-os tion nga ebanghelisador) ang gin-asayn didto, kag nakatigayon ako sa iya sing libro nga Ang Kamatuoran nga Nagadul-ong sa Kabuhi nga Dayon. Kutob gid sa umpisa, nakita ko nga ini amo ang kamatuoran.

“Sang ulihi, gin-agda ako nga makigbahin sa pagbantala nga hilikuton, apang nadaug ako sang kahadlok sa tawo. Samtang nagapamalaybalay, nangamuyo ako kay Jehova nga mapatay na lang ako sa baylo nga magbantala. Sang una nga pagpakigbahin ko sa pagbantala sa dalan, nagpanago ako sa diutay nga dalan, nagalaum nga wala sing isa nga makakita sa akon. Sang ulihi, nakatipon ako sing kaisog nga mapakita ang magasin sa isa nga naglabay, kag sadto lang nga nakahambal ako. Sadto nga adlaw, sa bulig ni Jehova, ginpaambit ko ang akon pasad-sa-Biblia nga paglaum sa madamo nga tawo.

“Sa karon, 12 ka tuig sang ulihi, bisan pigado sa materyal, ginapakabahandi ko gihapon ang pribilehiyo nga mag-alagad subong payunir kag padayon nga matigayon ang di-matungkad nga kalipay bangod sang pagpakig-ambit sang kamatuoran tuhoy sa Ginharian sa iban.”