Mga Tawo—Mas Labaw Lamang Bala nga mga Sapat?

“Importante gid bala kon ano ang aton pagpati sa ginhalinan sang kabuhi?”

Amo sini ang pamangkot sang isa ka 16-anyos nga dalagita sa Brazil sa introduksion sang iya pamulongpulong sa topiko nga “Mga Tawo​—⁠Mas Labaw Lamang Bala nga mga Sapat?” Gin-agda sia sang iya manunudlo sa pagsabat sina nga pamangkot sa klase sang nabaton sang iya manunudlo ang isa ka kopya sang Hunyo 22, 1998, nga guwa sang Awake! sa amo nga topiko.

Ginpadaku sang pamatan-on nga Saksi kon daw ano ka malaglagon ang panudlo sang ebolusyon nga ginpasad sa kinaugali nga pagpili. Halimbawa, madamo nga tawo ang nagapati nga ang teoriya sang ebolusyon nagdul-ong sa pila nga tamdon ang inaway subong kinaugali lamang nga bahin sang wala katapusan nga pagpanikasog nga makalampuwas, nga nagbulig sa pagpasad sing dalan para sa pag-uswag sang Pasismo kag Nazismo.

Ginpakita sang estudyante nga may daku nga kinatuhayan sa ulot sang mga tawo kag mga sapat. Sia nagsiling: “Mga tawo lamang ang makapalambo sing espirituwalidad. Mga tawo lamang ang nagatinguha nga mahibaluan ang kahulugan kag katuyuan sang kabuhi. Mga tawo lamang ang nabalaka sa kamatayon, ang interesado gid sa ila ginhalinan, kag may handum nga mabuhi sing dayon. Daw ano gid ka importante nga maghinguyang kita sing tion nga mahibaluan sing dugang pa ang tuhoy sa aton ginhalinan!”

Gindayaw sang manunudlo ang maayo nga presentasyon. Ginpatuhuyan niya ang kadalag-an sini sa katunayan nga ining tin-edyer nga Saksi maluyagon sa pagbasa. Nakilal-an ang dalagita sa eskwelahan subong maukod nga bumalasa sang pasad-sa-Biblia nga mga publikasyon subong sang Magmata! kag Ang Lalantawan.

Nabalaka gid ang mga Saksi ni Jehova sa epekto sang teoriya sang ebolusyon sa mga tagipusuon kag mga panghunahuna sang mga pamatan-on. Bangod sini, ginpalig-on sang kongregasyon nga ginapakig-updan sining dalagita ang lamharon nga mga Saksi nga hatagan sing isa ka kopya sang Hunyo 22, 1998, nga Awake! nga magasin ang ila mga manunudlo kag mga kabutho. Mga 230 ka magasin ang ginpanagtag sa nagkalainlain nga mga eskwelahan sa siudad. Ang pangulo sang Departamento sang Siensia sa isa ka eskwelahan nagsuskriber sing Awake! nga magasin.

Huo, importante gid kon ano ang aton ginapatihan tuhoy sa ginhalinan sang kabuhi! Ining pamatan-on kag ang iya mga abyan nagpakita nga ang pagtuo sa Manunuga importante gid sa ila kabuhi.