Ginbalik sini ang mga Singsing sa Ila mga Tudlo

“TAN-AWA ang akon mga tudlo. May makita ka bala nga tuhay?” Ginpakita sang isa ka lalaki ang iya kamot sa isa ka babayi, nga isa sang mga Saksi ni Jehova, nga nagtan-aw sa sini kag natalupangdan sa gilayon nga wala na ang iya singsing sa kasal. Ginpaathag niya nga indi na sila magsahuay sang iya asawa, gani namat-od sila nga magdiborsio. “Indi!” siling sang Saksi. “Kuhaa ini nga libro kag basaha ini. Buligan kamo sini sa inyo pag-asawahay.” Sa sina, ginhatagan niya sia sing isa ka kopya sang pasad-sa-Biblia nga libro nga Ang Ihibalo nga Nagadul-ong sa Kabuhi nga Walay Katapusan.⁠a

Pila ka adlaw sang ulihi nagbalik ang lalaki sa Saksi nga malipayon. Ginpakita niya sa iya ang iya kamot. Sa sini nga tion ginasuksok niya ang iya singsing sa kasal. Ginsugiran niya sia nga ginbasa nila sang iya asawa ang Ihibalo nga libro kag karon malipayon gid sila. Ginbalik sing literal sang libro ang mga singsing sa ila mga tudlo.

Ang laygay sang Biblia makabulig sa bana kag asawa nga magpakita sing matuod nga gugma sa isa kag isa. Amo sini bangod ang awtor sang Biblia wala sing liwan kundi ang aton Manunuga, nga nagasiling: “Ako, si Jehova, amo ang imo Dios, ang Isa nga nagatudlo sa imo sa kaayuhan mo, ang Isa nga nagatuytoy sa imo sa dalanon nga laktan mo.”​—⁠Isaias 48:⁠17.

[Nota]