Kon Ano ang Iya Ginakahidlawan sa Siudad sang New York
ANG karatula nga makita diri ginsulat sa atubangan sang isa sa mga tinukod sang pabrika sang Watchtower Society sa Brooklyn, New York, sugod sang dekada 1950. Ang mga pasahero, mga turista, kag iban pa nga nagaagi ginapahanumdom sa pagbasa sang Biblia adlaw-adlaw. Ang masunod nga sulat, nga nabaton gikan sa isa ka bata nga babayi nga Saksi, nagapakita sang pagkaepektibo sini nga pahanumdom.
“Ginsugid ko sa akon isa ka kabutho kon ano ang akon luyag himuon kon makatapos na ako sing hayskul. Ginsugid ko sa iya ang tuhoy sa Bethel, ang ulong talatapan sang mga Saksi ni Jehova, kag nalangkag gid sia. Ginsilingan niya ako nga nagapuyo sia sa Siudad sang New York sa bug-os niya nga kabuhi. Indi tuman ka relihioso ang iya pamilya, apang kada aga kon maglaaw sia sa bintana, may yara isa ka karatula nga nagasiling ‘Read God’s Word the Holy Bible Daily.’ Busa kada adlaw ginabasa niya ang iya Biblia antes magkadto sa eskwelahan.
“Sang maghalin na sa siudad, nagsiling sia nga ang iya ginakahidlawan sa Siudad sang New York amo nga kon magbugtaw sia, indi na niya makita ang pahanumdom nga basahon ang iya Biblia. Apang bangod sang ginsulat sa tinukod sang Watchtower, ang pagbasa sang Biblia nangin isa ka batasan, busa padayon sia nga nagabasa sang Biblia kada adlaw!”
Daw ano kaayo nga sugdan ang adlaw paagi sa pagbasa sing isa ka bahin sang Pulong sang Dios! Sa paghimo sini, pat-od nga maapresyar mo ang mga pinamulong ni apostol Pablo: “Ang balaan nga mga sinulatan . . . makapaalam sa imo sa kaluwasan paagi sa pagtuo may kaangtanan kay Cristo Jesus.”—2 Timoteo 3:15-17.