Isa ka Pinasahi nga Okasyon—Magatambong Ka Bala?

SA ISA ka halandumon nga adlaw sang kapin na sa 3,500 ka tuig ang nakaligad, ginsugo ni Jehova nga Dios ang tagsa ka panimalay sang naulipon nga mga Israelinhon sa Egipto sa pagpatay sing kordero ukon kanding kag sa pagwisik sang dugo sini sa mga bakalan kag sa ibabaw sang mga ganhaan sang ila mga balay. Sadto mismo nga gab-i, ginligaran sang anghel sang Dios ang mga balay nga gintandaan sa sining paagi apang ginpatay ang panganay nga mga anak nga lalaki sa mga puluy-an sang tanan nga Egiptohanon. Nian ginhilway ang mga Israelinhon. Sa anibersaryo sina nga hitabo, ginsaulog sang mga Judiyo ang Paskwa.

Sa gilayon sa tapos masaulog ni Jesucristo ang iya katapusan nga Paskwa upod sa iya mga apostoles, ginsugdan niya ang isa ka panihapon nga magapahanumdom sang iya mahalaron nga kamatayon. Ginpasa niya sa iya mga apostoles ang tinapay nga wala sing lebadura kag nagsiling: “Kuha kamo, kaon kamo. Nagakahulugan ini sang akon lawas.” Masunod gindaho niya sa ila ang kopa sang alak kag nagsiling: “Inom kamo gikan sini, kamo tanan; kay nagakahulugan ini sang akon ‘dugo sang katipan,’ nga iula tungod sa madamo sa kapatawaran sang mga sala.” Nagsiling man si Jesus: “Padayon ninyo nga himua ini sa handumanan nakon.” (Mateo 26:​26-28; Lucas 22:​19, 20) Gani ginsugo ni Jesus ang iya mga sumulunod nga saulugon ang iya kamatayon.

Sa sini nga tuig ang anibersaryo sang kamatayon ni Jesus magatupa sa Mierkoles, Abril 19, pagtunod sang adlaw. Magatipon ang mga Saksi ni Jehova sa bug-os nga kalibutan sa sining pinasahi nga gab-i agod saulugon ining Memoryal sa paagi nga ginsugo ni Jesus. Mainit gid ikaw nga ginaagda sa pagbuylog sa amon subong mga tumalambong. Palihug pamangkuta ang mga Saksi ni Jehova sa inyo lugar para sa eksakto nga oras kag lugar sang pagtipon.