Ngaa Dapat Mangin Mapinatawaron?

NAGHIMO sing panalawsaw ang mga sientipiko nga nagsugod sa pagpakita nga ang pagpatawad may positibo nga epekto sa emosyon​—⁠kag, posible gid, sa pisikal⁠—nga kapagros,” siling sang The Toronto Star sang Canada. Apang, si Propesor Carl Thor­e­sen sang Stanford University, E.⁠U.⁠A., panguna nga manugpanalawsaw para sa Stanford Forgiveness Project, nagsiling nga “pila lamang ka tawo ang nakahangop kon ano ang pagpatawad kag kon paano ini nagapanghikot.”

Ang matuod nga pagpatawad ginakabig nga isa ka importante nga bahin sang Cristianismo. Ang report sang The Toronto Star nagahatag sing kahulugan sa sini subong “pagbaton nga ginhimuan ikaw sing sayop, pagsikway sa tanan nga paghinakit, kag sa ulihi pagpakita sing kaawa kag bisan sing gugma sa nakasala.” Tuhay ini sa pagkunsinti, pagpasaylo, paglimot, ukon pagpanghiwala sa sala; ni nagakahulugan ini sang pagbutang liwat sang imo kaugalingon sa kahimtangan nga abusuhan. Ang report nagasiling nga ang yabi sa matuod nga pagpatawad amo ang “pagdula sa kaakig kag negatibo nga mga balatyagon.”

Ang mga manugpanalawsaw nagsiling nga kinahanglan ang dugang pa nga pagtuon sa pisikal nga mga benepisyo sang pagpatawad. Apang, nagareport sila sang mga benepisyo sa hunahuna, lakip ang “kubos nga kahuol, kabalaka kag kapung-aw.”

Ang pinakamaayo nga rason agod mangin mapinatawaron ginapabutyag sang Efeso 4:​32, nga nagasiling: “Mangin malulo sa isa kag isa, mainawaon sing malum-ok, hilway nga nagapinatawaray sa isa kag isa subong nga ang Dios man paagi kay Cristo hilway nga nagpatawad sa inyo.” May kaangtanan sa pagpatawad, subong man sa iban nga bahin, ginapalig-on kita nga mangin mga manug-ilog sang Dios.​—⁠Efeso 5:⁠1.

Ang indi pagpatawad sa iban samtang may rason agod magkaluoy makahalit sang aton kaangtanan sa Dios. Ginapaabot sa aton ni Jehova nga magpinatawaray kita sa isa kag isa. Nian makapangamuyo kita nga patawaron niya kita. ​​—⁠Mateo 6:​14; Marcos 11:​25; 1 Juan 4:⁠11.