“Isa ka Magayon nga Kanding sa Bukid”

ANG kagayon indi isa ka adhetibo nga mahimo gamiton sang kalabanan sa aton sa paglaragway sa isa ka kanding. Mahimo hunahunaon naton ang mga kanding subong mapuslanon nga mga sapat nga magakaon sang halos bisan ano nga butang kag magahatag sa aton sing manamit nga karne kag masustansia nga gatas—apang haluson naton ini tawgon nga magayon.

Walay sapayan sina, ang Biblia nagalaragway sang isa ka asawa subong “isa ka hiligugmaon nga babayi nga usa kag isa ka magayon nga kanding sa bukid.” (Hulubaton 5:18, 19) Si Solomon, nga manunulat sang tulun-an nga Hulubaton, isa ka maid-id nga maninilag sang talunon nga mga sapat sa Israel, busa may nagakaigo gid sia nga rason sa paggamit sini nga pagpaanggid. (1 Hari 4:30-33) Ayhan, kaangay sang iya amay nga si David, napanilagan niya ang mga kanding sa bukid nga masami nagasayo sa duog sa palibot sang En-gedi, malapit sa mga baybayon sang Patay nga Dagat.

Ang diutay nga mga panong sang mga kanding sa bukid nga nagapuyo sa malapit nga Desyerto sang Judea regular nga nagasayo sa tuburan sang En-gedi. Bangod amo lamang ini ang masaligan nga tuburan sang tubig sa sining kigang nga duog, ang En-gedi amo ang paborito nga ilimnan sang mga kanding sa bukid sa sulod sang mga siniglo. Sa katunayan ang ngalan nga En-gedi mahimo nagakahulugan sing “tuburan sang tinday nga kanding,” isa ka pamatuod sa regular nga presensia sang tinday nga mga kanding sa sini nga duog. Nagdangop diri si Hari David sang ginhingabot ni Hari Saul, bisan pa nga kinahanglan sia nga magkabuhi subong isa ka pugante “sa mga bato sang mga kanding sa bukid.”—1 Samuel 24:1, 2.

Sa En-gedi makita mo gihapon ang babayi nga ibex, ukon kanding sa bukid, nga nagapanaug sing maanyag sa batuhon nga pil-as samtang ginasundan ang lalaki nga kanding pakadto sa tubig. Nian mahimo mo na mahangpan ang pagpaanggid sa babayi nga ibex sa matutom nga asawa. Ang matawhay kag magayon nga paggawi sini nagapakita man sang babayinhon nga mga kinaiya. Ang tinaga nga “magayon” mahimo nga nagapatuhoy sa kaanyag kag kahinhin sang kanding sa bukid.a

Ang babayi nga ibex dapat mangin mabakod kag maanyag man. Subong sang ginpatalupangod ni Jehova kay Job, ang kanding sa bukid nagabata sa mga dalipi, sa batuhon, indi makadtuan nga mga duog diin ang pagkaon mahimo nga maiwat kag ang temperatura indi maayo. (Job 39:1) Walay sapayan sini nga mga kabudlayan, ginaatipan niya ang iya mga tinday kag ginatudluan ini sa pagsaka kag sa paglukso sa mga bato sing maabtik subong sa iya. Maisugon man nga ginaamligan sang ibex ang iya tinday gikan sa mga manunukob. Ang isa ka maninilag nakakita sing isa ka kanding sa bukid nga nagtabog sa isa ka agila sa sulod sang tunga sa oras, samtang ang tinday nagakuob sa idalom sini agod amligan.

Ang Cristianong mga asawa kag mga iloy masunson nga nagaatipan sang ila kabataan sa idalom sang mabudlay nga mga kahimtangan. Kaangay sang kanding sa bukid, nagapakita sila sing dedikasyon kag pagkadi-makagod sa pag-atipan sa sining hatag-Dios nga responsabilidad. Kag maisugon nga ginaamligan nila ang ila kabataan gikan sa espirituwal nga mga katalagman. Busa, sa baylo nga pakadiutayon ang mga babayi sa sini nga pagpaanggid, ginapatalupangod gid diri ni Solomon ang kaanyag kag katahom sang isa ka babayi—ang espirituwal nga mga kinaiya nga makita gid bisan sa labing mabudlay nga palibot.

[Nota]

[Mga retrato sa pahina 30, 31]

Ginapakita sang Cristianong asawa kag iloy ang matahom espirituwal nga mga kinaiya kon nagatuman sang iya hatag-Dios nga mga responsabilidad