“Isa ka Halimbawa sang Paghiusa”

AMO ina ang tig-ulo sang isa ka editoryal nga ginbalhag sa pamantalaan sa Indaiatuba, São Paulo, Brazil. Sin-o ang nagpakita sing halimbawa? “Ang mga Saksi ni Jehova, nga nagplano sa pagtukod sing bag-o nga ‘Kingdom Hall,’ subong sang pagtawag nila sa ila mga templo ukon mga awditoryom, nagahatag sing positibo kag matuod nga halimbawa sang pagbinuligay nga indi mahimo pasapayanan,” paathag sang manunulat.

Makita gid ang paghiusa sa tunga sang mga Saksi ni Jehova sa sina nga mga okasyon. Gani, ang artikulo nagpatalupangod: “Makatalandog gid nga makita ang mga kalalakin-an, mga kababayin-an, kag mga boluntaryo nga pamatan-on nga kinabubut-on nga nagabinuligay sa pagtukod sing isa ka duog diin makatipon sila sing tingob kag magsimba sa Dios.”

Ang mga Saksi ni Jehova nagapahamtang sing maayong halimbawa sa iban pa man nga mga bahin. “Dugang sa pagtuon kag pangamuyo, ang ila tulumuron amo ang pagpasag-uli liwat sa mga alkoholiko kag mga nagiyan sa droga kag ang pagtudlo sa mga tawo sang dalanon sang paghiusa kag gugma,” siling pa sang editoryal. Paano nila ini ginahimo? Nahisayran sang mga Saksi nga ang paghibalo kag pag-aplikar sang laygay sang Biblia nagabulig sa isa ka tawo nga mahilway gikan sa mga bisyo. Amo ina kon ngaa ginatinguhaan gid nila nga tudluan ang iban sang ila natun-an gikan sa Biblia. Ang editoryal naghinakop nga ang ginapakita nila “isa ka halimbawa nga, sa walay duhaduha, dapat gid ilugon.”

Ang mga miting sang mga Saksi ni Jehova bukas sa publiko kag wala sing ginakuha nga mga koleksion. Mainit ka nga ginaagda sa pagduaw sa Kingdom Hall nga malapit sa imo.