Kon Paano Nila Napamatukan ang Pag-ipit sang mga Katubotubo
ANG handum nga pagabatunon nagaimpluwensia sa madamo nga makigbagay sa panghunahuna kag mga buhat sang ila mga katubotubo. Ang mga pamatan-on ilabi na nga nagakinahanglan sing kabakod sa pagpangindi sa makahalalit nga mga buhat, subong sang pag-abuso sa droga kag seksuwal nga imoralidad. Paano nila mapamatukan ang pag-ipit sang mga katubotubo?
Ang duha ka dalagita sa Poland nagsulat sining karon lang: “Ang espiritu sang kalibutan maathag nga makita sa tunga sang madamo namon nga katubotubo. Nagakodigo sila sa mga eksaminasyon sa eskwelahan, nagapamuyayaw, kag mahuyugon sa uso nga mga panapton kag sa magansal, imoral nga musika. Daw ano kami ka malipayon nga may mga artikulo nga napatuhoy sa amon subong mga pamatan-on kag nagaamlig sa amon gikan sa impluwensia sang di-kontento kag rebelyuso nga mga pamatan-on!
“Indi mapabutyag sa mga tinaga ang amon pagpasalamat sa mga artikulo sang Lalantawan nga nagapatudok sa amon nga subong mga pamatan-on ginakinahanglan kag ginaapresyar kami. Ang laygay sang Biblia nga nabaton namon nakabulig sa amon nga tuytuyan ang amon mga tikang sing nagakaigo agod padayon nga pahamut-an si Jehova nga Dios. Kumbinsido kami nga ang matutom nga pag-alagad kay Jehova amo ang pinakamaayo nga dalanon sang kabuhi.”
Huo, mahimo mapamatukan sang mga pamatan-on ang pag-ipit sang mga katubotubo. Paagi sa paghanas sa ila “ikasarang sa paghantop,” natun-an sang Cristianong mga pamatan-on nga makapamat-od sing maalamon nga wala nagapabanaag sang “espiritu sang kalibutan” kundi, sa baylo, sang “espiritu nga gikan sa Dios.”—Hebreo 5:14; 1 Corinto 2:12.