Ang Relihion Bala Makapaluntad sang Bug-os Kalibutan nga Paghidait?

KUTOB sang Agosto 28 tubtob Agosto 31, 2000, kapin sa 500 ka tiglawas gikan sa 73 ka pungsod ang nagtipon sa New York City. Nagtipon sila sa Nasyones Unidas para sa “The Millennium World Peace Summit of Religious and Spiritual Leaders.” Ang mga lider​​—⁠ang madamo nagasuksok sing mga turbante, duag-kahil nga mga panapton, bulbulon nga mga takdong, ukon maitom kag malaba nga mga kunop​​—⁠nagrepresentar sa nagkalainlain nga mga pagtuluuhan. Lakip sa sini amo ang Baha’i, Budhismo, Hinduismo, Islam, Jainismo, Judaismo, Shinto, Sikhismo, Taoismo, Zoroastrianismo, kag mga relihion sang Cristiandad.

Nagsapol ang mga delegado sa Nasyones Unidas para sa nahaunang duha ka adlaw sang apat-ka-adlaw nga komperensia. Apang, ang komperensia wala gin-organisar ukon gingastuhan sang Nasyones Unidas kundi sang nanarisari nga mga organisasyon. Walay sapayan sina, ang UN kag ang relihioso nga mga lider naghambal tuhoy sa pagkaimportante sang pagbinuligay agod tapuson ang kaimulon, rasismo, mga problema sa palibot, inaway, kag mga hinganiban nga makapatay sa madamo nga tawo.

Ang mga delegado naglagda sing isa ka dokumento nga natig-uluhan “Salabton sa Tugob-globo nga Paghidait.” Samtang ginakilala nga ang kasingki kag inaway “ginahimo kon kaisa sa ngalan sang relihion,” ang dokumento nagpahayag nga ang mga naglagda dapat “makigkooperar sa Nasyones Unidas . . . sa paghimud-os sing paghidait.” Apang, wala sing espesipiko nga mga resolusyon nga nagapakita kon paano ini himuon.

Sa ikaduha nga adlaw, si Bawa Jain, ang sekretaryo-heneral sang komperensia sang mataas nga mga opisyales, naghinakop sang iya nagabukas nga pamulongpulong paagi sa pagpaathag nga sang nagligad nga pila ka tuig natalupangdan niya ang isa ka larawan sa Nasyones Unidas. Makita sa larawan ang isa ka tawo nga mas mataas sangsa tinukod sang United Nations Secretariat. Nagapanuktok sia sa tinukod nga daw isa ini ka ganhaan. Sa ubos sang laragway amo ang kapsion: “Prinsipe sang Paghidait.” Si G. Jain nagsiling: “[Ang larawan] may daku nga epekto sa akon sang nakita ko ini. Akon ginpamangkot ang lainlain nga mga tawo kon ano ang buot silingon [sini]. Sa banta ko may sabat na ako. Ang inyo tanan pagtipon diri, ang espirituwal kag relihioso nga mga lider sang kalibutan, nagapamatuod sa akon nga amo [ini] ang prinsipe sang paghidait nga nagapanuktok sa ganhaan sang Nasyones Unidas.”

Tuhay ang pagtamod nga ginahatag sang Biblia. Ginapakita sini nga ang Prinsipe sang Paghidait amo si Jesucristo. Paluntaron niya ang bug-os kalibutan nga paghidait, indi paagi sa mga pagpanikasog sang politikal ukon relihioso nga mga lider sining kalibutan, kundi paagi sa Ginharian sang Dios. Ini amo ang Ginharian​​—⁠ang langitnon nga panguluhan sang Dios⁠​—⁠​nga madinalag-on nga magahiusa sa matinumanon nga katawhan kag magapatuman sang kabubut-on sang Dios sa duta.​​—⁠Isaias 9:⁠6; Mateo 6:​9, 10.