Mga Lobo Kami Anay​—⁠Karon mga Karnero Na!

Sang magagmay pa kami ni Sakina, tuparay kami balay. Daku si Sakina kag mabukod, samtang magamay naman ako kag maniwang. Pirme kami sadto nagaaway, apang isa ka adlaw nagdumugay gid kami. Sugod sadto wala na kami nagasapakanay ukon nagatamyawanay. Sang ulihi, pareho kami nga nagsaylo sang balay kag wala na nagkit-anay liwat.

Sang 1994, nagsugod ako sa pagtuon sang Biblia upod sa mga Saksi ni Jehova, kag amat-amat nga nagbag-o ang akon personalidad. Pagligad sang apat ka tuig samtang nagatambong sa amon pinasahi nga adlaw nga asambleya sa Bujumbura, Burundi, nakibot ako sang nagkit-anay kami ni Sakina. Nalipay ako nga nagtambong sia, apang daw malas-ay ang amon pagtamyawanay. Sang ulihi sina nga adlaw, daw indi ako makapati sang nakita ko sia nga kaupod sang mga kandidato para sa bawtismo! Daku man gali ang iya ginbag-o. Indi na gali sia ang palaaway nga masami ko ginaaway sang una. Daw ano kaayo nga makita sia nga nagpahayag sang iya dedikasyon sa Dios sa publiko paagi sa pagpabawtismo sa tubig!

Sang nagtakas sia gikan sa tubig, dalidali ako nga naghakos sa iya kag ginhutikan sia: “Nadumduman mo pa bala kon ano ka grabe kita mag-away sadto?” “Huo,” siling niya, “nadumduman ko, pero nagligad na yadto. Nagbag-o na ako karon.”

Pareho kami nga nalipay bangod nasapwan namon ang kamatuoran sang Biblia nga nagapahiusa kag nagbag-o sang amon kaangay-lobo nga mga personalidad nga nangin kaangay sang karnero nga ginapanag-iyahan sang Daku nga Manugbantay, si Jehova nga Dios. Matuod gid nga ang kamatuoran sang Biblia nagabag-o sang kabuhi.