“Sa Katapusan Nahibal-an Ko na Kon Ano ang Akon Diperensia!”

AMO sini ang nabatyagan sang isa ka lalaki sa Tokyo sang mabasa niya ang sugilanon sang kabuhi sa Disiembre 1, 2000, nga guwa sang Ang Lalantawan. Ang artikulo natig-uluhan “Wala Kamo Makahibalo Kon Ano ang Mangin Kabuhi Ninyo Buwas,” kag ginsaysay sini ang eksperiensia sang isa anay ka misyonero nga nagabalatian sang kilala sa medisina nga manic-depressive psychosis.

Sa isa ka sulat nga ginpadala sa mga manugbalhag sini nga magasin, ining lalaki nga taga-Tokyo nagsiling: “Ang mga sintomas nga ginlaragway pareho gid sa akon ginabatyag. Gani nagkadto ako sa isa ka ospital nga nagabulong sang mga may balatian sa hunahuna kag nasayasat nga may manic depression ako. Ang doktor nga nagsayasat sa akon nakibot. Sia nagsiling, ‘Ang mga tawo nga may amo sini nga balatian talagsa lang nagahunahuna nga nagamasakit sila.’ Nagbulig ini sa akon nga matukiban ang balatian antes pa ini maglala.”

Minilyon ka tawo sa bug-os nga kalibutan ang nakabenepisyo sa nagkalainlain nga paagi gikan sa pagbasa sang tagsa ka guwa sang Ang Lalantawan kag sang kaupod sini nga magasin, ang Magmata! Nasapwan nila nga impormatibo kag makawiwili ang mga artikulo. Ang magasin nga Lalantawan ginaimprinta na karon sa 141 ka hambal, kag ang Magmata! ginabalhag sa 86 ka hambal. Mawili ka man sa regular nga pagbasa sing Ang Lalantawan kag Magmata!