“Nakahibalo Bala Kamo Kon Ngaa Ginauli Ko ang Inyo Kuwarta?”
‘KINAHANGLAN ko gid ang kuwarta!’ siling ni Nana sa iya kaugalingon, isa ka nagasolo nga iloy sang tatlo ka bata nga lalaki nga nagapuyo sa Kaspi sa Republika sang Georgia. Isa ka aga ang iya handum nga makakita sing kuwarta natuman. Nakakita sia sing 300 ka lari sa tupad sang estasyon sang pulis. Wala na sing iban nga tawo sa palibot. Daku gid yadto nga kantidad. Sa pagkamatuod, wala pa makakita si Nana sing 100 ka lari sugod sang ang lari nangin pungsudnon nga pilak sang nagligad nga lima ka tuig. Ang lokal nga mga negosyante indi makaganar sing amo sini kadaku nga kantidad pagkatapos sang madamo nga tinuig nga pagtrabaho.
‘Anhon ko man ining kuwarta kon madula ko ang akon pagtuo, diosnon nga kahadlok, kag espirituwalidad?’ nahunahuna ni Nana. Napalambo niya ining Cristianong mga kinaiya, kag nakaagi pa gani sia sing mapintas nga paghingabot kag mga pagbakol bangod sa iya pagtuo.
Sang magkadto sia sa estasyon sang pulis, nakita ni Nana ang lima ka pulis nga indi mahim-os kag daw may ginapangita. Narealisar niya nga ginapangita nila ang kuwarta, gani nagpalapit sia sa ila kag nagsiling: “Nadulaan bala kamo?”
“Kuwarta,” sabat nila.
“Pila?”
“Tatlo ka gatos ka lari!”
“Nakit-an ko ang inyo kuwarta,” siling ni Nana. Pagkatapos nagpamangkot sia: “Nakahibalo bala kamo kon ngaa ginauli ko ang inyo kuwarta?” Wala sila makahibalo kon ngaa.
“Bangod isa ako sa mga Saksi ni Jehova,” padayon niya. “Kon indi ako Saksi ni Jehova, indi ko na pag-iuli ang inyo kuwarta.”
Ang hepe sang pulis nga nadulaan sing kuwarta naghatag kay Nana sing 20 ka lari bilang apresasyon sa iya pagkabunayag.
Ang hitabo madasig nga naglapnag sa bilog nga distrito sang Kaspi. Sang masunod nga adlaw, ang isa ka manugpaninlo nga babayi nagguwa halin sa estasyon sang pulis kag nagsiling kay Nana: “[Ang hepe] pirme may yara sang inyo literatura sa iya opisina. Mahimo nga apresyahon gid niya ini sing labi pa karon.” Ang isa ka pulis naghambal pa gani: “Kon ang tanan nga tawo mga Saksi ni Jehova, sin-o pa ang makahimo sing mga krimen?”