Isa Ka Video nga Nagatandog sa Tagipusuon sang mga Pamatan-on

MADAMO nga pamatan-on ang napahulag nga binagbinagon sing serioso ang ila paggawi sang matan-aw nila ang video nga Young People Ask​​—⁠How Can I Make Real Friends?⁠a Ang video nagaunod sing maayo nga mga laygay gikan sa Kasulatan, personal nga mga komento sang lamharon nga mga Cristiano, kag isa ka makatalandog nga modernong drama pasad sa kasaysayan ni Dina sa Biblia. (Genesis, kapitulo 34) Ang masunod nga mga komento tuhoy sa video naghalin sa Mexico.

Si Martha nagpanugiron: “Natandog gid ako sang video. Daw ginhimo gid ini para sa akon. Abi ko bastante na nga mahibaluan sang akon mga manunudlo kag mga kaeskwela nga isa ako sang mga Saksi ni Jehova. Napaslawan ako nga pamatud-an ini paagi sa pagbantala sa ila. Nagapasalamat ako sa tanan nga impormasyon nga gin-aman ni Jehova, labi na kon nagatandog ini sa aton sing tuman subong sini nga video.”

Si Juan Carlos nagsiling: “Ginapalig-on gid ikaw sining video nga mamensar. Subong isa ka pamatan-on, nakahimo ako sing mga sayop kag nakita ko ang akon kaugalingon sa pila ka mga karakter sa drama. Sang nagligad nga pila ka mga tuig, nagkabuhi ako sing doble-kara, apang narealisar ko nga indi maayo ang madangatan sini nga pagkabuhi. Sang natan-aw ko ang video, nangin determinado ako nga mangin matutom kay Jehova.”

Si Sulem nagtu-ad: “Sang natan-aw ko ang video, natandog gid ang akon balatyagon. Antes sini, nag-untat na ako sa pagbasa sang Biblia, kag talagsa na lang ako nagapangamuyo kay Jehova. Sang ginpamatian ko ang mga komento sang mga pamatan-on sa video, napahulag ako nga tun-an liwat ang Biblia kag mangamuyo kay Jehova.”

Ang mga pamatan-on karon nagaatubang sing madamo nga mga hangkat, kag ang ila napili nga mga abyan masami nga may daku nga impluwensia kon paano sila magkabuhi. (Salmo 26:⁠4; Hulubaton 13:20) Ang video nga Young People Ask​​—⁠How Can I Make Real Friends? nagabulig sa madamo nga maghimo sing maayo nga mga desisyon tuhoy sa sini.

[Nota]