Sugilanon nga Nagapalig-on sang Pagtuo kag Kaisog—Ang mga Saksi ni Jehova sa Ukraine
SUBONG nga ginhingabot ang unang siglo nga mga Cristiano, amo man ang mga alagad sang Dios karon. (Mateo 10:22; Juan 15:20) Diutay lamang ang mga lugar nga ang paghingabot mas madugay kag mas mabudlay sangsa Ukraine, diin ang pagbantala nga hilikuton gindumilian sa sulod sang 52 ka tuig.
Ang 2002 Yearbook of Jehovah’s Witnesses nagsaysay sang sugilanon sang mga katawhan sang Dios sa sini nga pungsod. Sugilanon ini sang pagtuo, kaisog, kag kalig-on sa atubangan sang mabudlay gid nga kahimtangan. Ang masunod amo ang pila ka komento sang apresasyon nga nabaton sang sanga talatapan sang mga Saksi ni Jehova sa Ukraine.
“Nabasa ko na ang 2002 Yearbook. Indi ko mapunggan ang akon kaugalingon sa paghibi samtang ginabasa ko ang inyo hilikuton sa Ukraine. Luyag ko nga mahibaluan ninyo nga napalig-on gid ako sang inyo makugi nga halimbawa kag mabakod nga pagtuo. Nalipay gid ako nga mangin katapo sang isa ka espirituwal nga pamilya kaupod ninyo. Salamat gid sa inyo gikan sa alibutod sang akon tagipusuon!”—Andrée, Pransia.
“Wala sing mga tinaga nga makalaragway kon daw ano ang akon pagpasalamat sa inyo kag kay Jehova para sa 2002 Yearbook. Nagatululagay ang akon luha samtang ginabasa ko ang madamo nga eksperiensia sang mga kauturan nga naghinguyang sang labing mabungahon nga tinuig sang ila kabuhi sa mga bilangguan kag mga kampo konsentrasyon. Ginadayaw ko ang ila kaisog. Bisan 27 ka tuig na ako nga Saksi, madamo gihapon ako sing matun-an gikan sa sining mga kauturan. Ginpalig-on nila ang akon pagtuo sa aton langitnon nga Amay, nga si Jehova.”—Vera, anay Yugoslavia.
“Nagsulat ako nga malipayon bangod sang inyo maayong halimbawa sang pagbatas kag katutom sa sulod sang mga tinuig sang pagpamatok. Ang inyo bug-os nga pagsalig kay Jehova kag ang inyo determinasyon nga magpabilin nga matutom nagahatag sa inyo sing kadungganan. Dugang pa, ang inyo pagkamapainubuson samtang nagabatas sa mga pagtilaw nagapabakod sang akon pagtuo nga wala ginapabay-an ni Jehova ang iya katawhan. Bangod sang inyo maayo nga halimbawa sang kaisog, kapag-on, kag pagkamabinatason, mas mahapos namon nga maatubang ang amon indi tanto kabudlay nga mga problema.”—Tuteirihia, French Polynesia.
“Sang natapos ko basa ang Yearbook, dapat ako magsulat sa inyo. Natandog gid ako sang tanan nga makapalig-on nga mga eksperiensia. Nalipay ako nga nangin katapo sining isa ka maunungon, nahiusa nga organisasyon, nga ginatuytuyan sang isa ka mahigugmaon kag matinatapon nga Amay, nga nagahatag sa aton sing kusog sa husto nga tion. Nasubuan gid ako nga tuman kadamo sang maisog kag makugi nga mga alagad ni Jehova ang nag-antos sing daku kag napatay pa gani. Apang nalipay man ako bangod subong resulta sang ila kaisog kag kakugi, madamo pa nga mga tawo ang nakatuon sang kamatuoran kag nakakilala sa aton mahigugmaon nga Amay.”—Colette, Netherlands.
“Nagsulat kami sang akon asawa agod isiling sa inyo nga natandog gid ang amon mga tagipusuon samtang ginabasa namon ang sugilanon tuhoy sa Ukraine sa Yearbook. Kamo nga matutom nga mga kauturan nagpakita sing talalupangdon nga halimbawa sang pagbatas sa idalom sang malawig kag daku nga kabudlayan. Nahisuno sa mga pulong sang Hulubaton 27:11, mahimo nga nalipay gid si Jehova nga mahibaluan nga tuman kadamo nga matutom nga mga kauturan sa Ukraine ang naghupot sang di-mabugto nga integridad walay sapayan sang tanan nga malaut nga buhat sang Yawa.”—Alan, Australia.
“Naghibi ako sang nabasa ko ang tuhoy sa mga kauturan sa Ukraine. Madamo gid ang ila gin-antos—mga tinuig sang pagkabilanggo, pagkastigo, pagpigos, kag pagbulag sa pamilya. Luyag ko ipahibalo sa mga kauturan nga nagaalagad gihapon sa inyo mga kongregasyon nga ginahigugma kag ginadayaw ko gid sila tanan. Nalipay gid ako sa ila kaisog kag kalig-on. Nahibaluan ko ang ginhalinan sang ila kusog, ang espiritu ni Jehova. Malapit si Jehova sa aton, kag luyag niya nga buligan kita.”—Sergei, Rusya.
“Ginbasa ko ang 2002 Yearbook, kag naghibi ako. Madamo nga kauturan sa amon kongregasyon ang nagaistorya tuhoy sa inyo. Hamili gid kamo. Nalipay gid ako nga mangin bahin sang isa ka daku nga espirituwal nga pamilya.”—Yeunhee, South Korea.
“Natandog gid ako sa inyo pagtuo, pagbatas, kag di-mationg nga gugma kay Jehova kag sa iya Ginharian. Kon kaisa wala namon ginapabaloran ang kahilwayan nga amon ginaagom kag ang bugana nga espirituwal nga pagkaon nga ginaaman ni Jehova sa amon. Apang, indi subong sini sa inyo bahin. Ang inyo halimbawa sang pagtuo nagbulig sa amon nga mahangpan nga kon may yara kita suod nga kaangtanan sa aton Dios, hatagan niya kita sing kusog agod mabatas ang tanan nga mga pagtilaw.”—Paulo, Brazil.
“Nabasa ko ang inyo mga eksperiensia sa 2002 Yearbook. Natandog gid ako sa sini, ilabi na ang eksperiensia ni Utod Lydia Kurdas. Nagbatyag ako sing pagkasuod sa sini nga utod.”—Nidia, Costa Rica.
“Sini nga adlaw natapos ko basa ang 2002 Yearbook. Samtang ginbasa ko ini, napalig-on ang akon pagtuo kay Jehova. Ang indi ko gid malipatan amo ang sugilanon sang ang mga binhi sang pangduhaduha gintanom may kaangtanan sa mga nagapanguna. Gintudluan ako sini nga indi gid pagduhaduhaan ang mga utod nga nagapanguna. Madamo gid nga salamat sa inyo! Ining espirituwal nga pagkaon makapalig-on gid kag nagahanda sa amon sa tion nga ang amon pagtuo mahimo tilawan.”—Leticia, Estados Unidos.
“Nagapasalamat gid kami sa sining ekselente nga Yearbook. Madamo nga mga manugbantala ang nagbasa sa una nga tion tuhoy sa mga hilikuton sang amon mga kauturan sa Ukraine. Ang mga kauturan diri napalig-on. Madamo, ilabi na sa tunga sang mga pamatan-on, ang nagpauswag sang ila hilikuton sa pag-alagad. Ang iban nagsugod sa pag-alagad subong mga regular ukon auxiliary payunir. Napalig-on ang tanan sa mga sugilanon sang mga kauturan nga nag-alagad kay Jehova sa tion sang pagdumili.”—Komite sa pag-alagad sa isa ka kongregasyon, Ukraine.
Ang katutom sang aton mga kauturan sa Ukraine nangin isa gid ka tuburan sang pagpalig-on sa mga katawhan ni Jehova sa bug-os nga kalibutan. Ang matuod, ang regular nga pagbasa sa makapalig-on nga mga sugilanon sa Yearbook kada tuig isa ka maayo nga paagi agod palig-unon ang aton pagtuo kag pagbatas sa sining importante nga mga tion.—Hebreo 12:1.