Kon Paano Matigayon ang Malawig kag Malipayon nga Kabuhi
“ANG iban nagasiling nga ang tanan luyag mabuhi sing sigesige, apang wala sing luyag nga magtigulang. Ang madamong tawo nga manugretiro na ang pangidaron nagapaabot sing kapin nga tion sa kaugalingon kag mas diutay nga responsibilidad. Apang, nahadlok sila nga mangin wala sing katuyuan ang ila kabuhi kag mangin wala sing pulos. Nahangawa man sila tuhoy sa pag-isahanon, kasubo, kag pagluya sang lawas.
Ano, nian, ang sekreto sang malipayon nga kabuhi? Ang maayo nga mga abyan kag mahigugmaon nga pamilya nagabulig sa pagpahalipay sa mga lamharon kag mga tigulang. Apang ang nabulig sang iban sa kabuhi sang isa ka tigulang indi amo ang importante nga butang. Ang labi pa ka importante amo ang mahimo sang isa ka tigulang para sa iban.
Ang isa ka malawig nga pagtuon sa 423 ka tigulang nga mag-asawa nagapakita nga “ang pagbulig sa iban mahimo makabulig sa pagpalawig sang aton kabuhi.” Si Stephanie Brown, nga nagdumala sang pagtuon, nagapaathag: “Ginapakita sini nga mga resulta nga indi ang makuha naton gikan sa kaangtanan sa iban ang tuman ka mapuslanon; kundi ang aton mahatag.” Ini nga paghatag mahimo maglakip sang pagbulig sa iban sa hilikuton sa balay, pag-atipan sa mga kabataan, pagpatigayon sing mga hilikuton sa gua sang balay, pag-aman sing transportasyon, ukon pagpamati sa isa nga luyag makighambal.
Mga 2,000 ka tuig na ang nagligad, si Jesucristo nagsiling: “May kapin nga kalipay sa paghatag sangsa pagbaton.” (Binuhatan 20:35, NW) Ang pagtigayon sing malawig kag malipayon nga kabuhi wala nasandig sa daku nga deposito sa bangko ukon sa mga terapiya kag dieta nga nagapabataon sa hitsura. Sa baylo, nagalakip ini sang pagpabilin nga aktibo kag paghinguyang sing tion, enerhiya, kag kusog sang isa sa pagpauswag sang kabuhi sang iban.
Apang, ang paghatag indi pa tuman agod maluwas kita sa pagtigulang, balatian, kag kamatayon. Ang Ginharian lamang sang Dios ang makadula sining mga butang. Sa idalom sang paggahom sini, ang balatian madula kag “wala na sing kamatayon.” (Bugna 21:3, 4; Isaias 33:24) Sa katunayan, ang matinumanon nga mga tawo magakabuhi sing dayon kag sing malipayon sa paraiso nga duta. (Lucas 23:43) Ang mga Saksi ni Jehova malipay sa paghatag sa iban sining pasad-sa-Biblia nga paagi sa pagtigayon sing malawig kag malipayon nga kabuhi.