Bulig sa Aton Balatyagon

DAW madaug ka bala kon kaisa sang negatibo nga balatyagon? Madali ka bala mabalaka, maakig, ukon maluyahan sing buot? Daw indi mo na bala masarangan ang mga kabalaka sa kabuhi? Ano ang makabulig sa imo?

Ini nga mga reaksion normal lang. Nagahatag ini sing duag sa kabuhi kon makontrol sing nagakaigo. Apang, ginabaton sang Biblia nga ang “pagpamigos nagapabuang sa maalam.” (Manugwali 7:7) Sa kalibutan nga daw kinaandan na lang ang kasingki kag mga aksidente, sin-o bala ang indi apektado sang mga nagakatabo sa iya palibot? Apang, ang Kasulatan nagsiling man: “Wala na sing maayo pa sangsa magkalipay ang tawo sa iya mga binuhatan.” (Manugwali 3:22) Busa, agod mangin mas makalilipay ang kabuhi, kinahanglan magtuon kita nga magkalipay paagi sa pagpalambo sing positibo nga balatyagon. Paano naton mapalambo ang positibo nga emosyon kag makontrol ang makahalalit nga balatyagon?

Ang praktikal nga mga tikang masami nga nagapahaganhagan sang aton negatibo nga balatyagon. Halimbawa, sa baylo nga magkabalaka kita sa mga butang nga wala na kita sing mahimo pa, indi ayhan mas maayo nga bag-uhon naton ang aton rutina ukon ang aton kahimtangan? Ang pagdayandayan, pagpamati sa mayuyom ukon makaparelaks nga musika, pag-ehersisyo sing lakas, ukon pagbulig sa iban makapaumpaw kag makapahalipay sa aton.​​—Binuhatan 20:35.

Apang, ang pinakamaayo nga paagi sa pagdula sang negatibo nga panghunahuna amo ang pagsalig sa aton Manunuga. Kon indi gihapon madula ang negatibo nga panghunahuna, kinahanglan naton nga ‘itugyan sa Dios ang tanan naton nga kabalaka’ paagi sa pangamuyo. (1 Pedro 5:​6, 7) Ang Biblia nagapasalig sa aton: “Si Jehova malapit sa mga buong sing tagipusuon . . . Madamo ang mga kapahamakan sang matarong, apang gikan sa sini tanan ginaluwas sia ni Jehova.” (Salmo 34:​18, 19) Paano kita makasalig nga ang Dios mahimo mangin ‘kabulig naton kag Manug-aman sing kaluwasan’? (Salmo 40:17) Mahimo naton ini paagi sa pagtuon sa Biblia kag sa pagpamalandong sa matuod nga mga halimbawa sang pagpakita mismo sang Dios sing interes sa kaayuhan sang iya mga alagad.