“Amo Gid Ini ang Labing Balaan kag Labing Halangdon nga Ngalan sang Dios”

Amo ini ang ginsiling ni Nicholas nga taga-Cusa sa iya sermon sang 1430.a Isa sia ka tawo nga interesado sa madamo nga butang. Halimbawa, nagtuon sia sing Griego, Hebreo, pilosopiya, teolohiya, matematika, kag astronomiya. Sa edad nga 22, nalab-ot niya ang pinakamataas nga edukasyon tuhoy sa kasuguan sang Romano Katoliko. Sang 1448, gintangdo sia bilang kardinal.

Mga 550 ka tuig ang nagligad, si Nicholas nagpatukod sing balay alaypan para sa mga tigulang sa Kues, nga ginatawag na karon nga Bernkastel-Kues, isa ka banwa nga nahamtang mga 130 kilometros sa bagatnan sang Bonn, Alemanya. Sa sini nga tinukod makita karon ang koleksion sang 310 ka manuskrito ni Cusa. Ang isa sini amo ang Codex Cusanus 220, sa diin masapwan ang sermon ni Cusa sang 1430. Sa sermon nga, “Sa Ginsuguran Amo ang Pulong” (In principio erat verbum), gingamit ni Nicholas ang Iehoua, nga amo ang ngalan ni Jehova sa Latin.b Ang pahina 56 nagaunod sang masunod nga mga dinalan tuhoy sa ngalan sang Dios: “Hatag ini sang Dios. Amo ini ang Tetragrammaton, buot silingon, ang ngalan nga may apat ka letra. . . . Amo gid ini ang labing balaan kag labing halangdon nga ngalan sang Dios.” Ining ginsiling ni Nicholas nahisanto sa kamatuoran nga ang ngalan sang Dios mabasa sa orihinal nga teksto sa Hebreong Kasulatan.​—Ex. 6:3.

Ini nga sinulatan nga naggikan pa sa maaga nga bahin sang ika-15 nga siglo, amo ang isa sa pinakadaan nga dokumento nga nagaluntad karon nga nagbadbad sang Tetragrammaton nga “Iehoua.” Ini nga sinulatan nagpamatuod pa gid nga ang pagbadbad sa ngalan sang Dios nga kaanggid sang “Jehova” amo ang kinaandan nga ginagamit sa sulod na sang mga siglo kon isulat ang ngalan sang Dios.

[Mga footnote]

[Piktyur sa pahina 16]

Librarya ni Cusa