Pinasahi nga Pamulongpulong Publiko
May Matuod Bala nga Relihion sa Pagtamod sang Dios?
Ginasunod sang madamo nga tawo ang relihion sang ila mga ginikanan. Ang iban naman nagapili sa ulihi sang gusto nila nga relihion. Madamo gid sing pililian nga relihion sa karon. Gani, mahimo mamangkot ka, ‘Importante gid bala kon ano ang akon relihion?’
Ina nga pamangkot sabton sa pamulongpulong publiko nga may tema, “May Matuod Bala nga Relihion sa Pagtamod sang Dios?” Ining pamulongpulong nga base sa Biblia hiwaton sa sobra 230 ka kadutaan sa bug-os nga kalibutan. Sa kalabanan nga lugar, hiwaton ini sa Kingdom Hall sang mga Saksi ni Jehova sa Domingo, Abril 26, 2009. Sugiran ka sang mga Saksi sa inyo lugar kon ano nga oras kag kon diin ini hiwaton. Ginaagda ka gid nga magtambong.