Ang Tanan Bala nga “Cristiano” Cristiano?
ANO kadamo ang mga Cristiano? Suno sa Atlas of Global Christianity, mga 2.3 bilyones ang Cristiano sa bilog nga kalibutan sang 2010. Pero ginapakita man sini nga publikasyon nga naghalin sila sa sobra 41,000 ka sekta, nga ang kada isa may kaugalingon nga mga doktrina kag prinsipio. Bangod madamo katama ang “Cristiano” nga relihion, natural lang nga maligban ang mga tawo. Mahimo sila mamangkot, ‘Ang tanan bala nga nagapangangkon nga Cristiano matuod nga Cristiano?’
Para masabat ini, ibutang ta nga may isa ka tawo nga makadto sa iban nga pungsod kag dapat niya ipresentar ang iya citizenship sa opisyal sang imigrasyon. Dapat niya ipakita ang iya identipikasyon, pareho sang pasaporte. Sing kaanggid, indi bastante nga magsiling ang isa ka matuod nga Cristiano nga nagatuo sia sa Cristo. Dapat may ipakita sia nga identipikasyon. Ano ina?
Ang termino nga “Cristiano” una nga gingamit pagkatapos sang 44 C.E. Ang historian sa Biblia nga si Lucas nagsulat: “Didto sa Antioquia una nga gintawag nga mga Cristiano ang mga disipulo paagi sa pagtuytoy sang Dios.” (Binuhatan 11:26) Ginapakita diri nga gintawag nga mga Cristiano ang mga disipulo sang Cristo. Paano ang isa ka tawo mangin disipulo ni Jesucristo? Ang The New International Dictionary of New Testament Theology nagpaathag: “Ang mangin disipulo ni Jesus nagakahulugan nga ginasakripisyo [sang isa] ang iya kabuhi . . . samtang nagakabuhi sia.” Gani ang matuod nga Cristiano nagatuman sa mga panudlo kag mga sugo ni Jesus, ang Tagtukod sang Cristianismo. Ginahimo niya ini sing bug-os kag wala sing ginapaabot nga kabaylo.
May amo bala sini nga mga tawo sa nagapangangkon nga mga Cristiano subong? Ano ang ginsiling ni Jesus nga tanda sang iya matuod nga mga sumulunod? Maayo gid kon binagbinagon mo ang sabat sang Biblia sa sini nga mga pamangkot. Sa masunod nga mga artikulo, usisaon naton ang lima ka ginsiling ni Jesus nga tanda sang iya matuod nga mga sumulunod. Hibaluon naton kon paano ini ginpakita sang mga Cristiano sang unang siglo, kag kon sin-o sa nagapangangkon nga mga Cristiano subong ang nagapakita sini nga mga tanda.