Ginpromisahan bala ni Jesus ang malauton sang kabuhi sa langit?

Nag-utwas ini nga pamangkot bangod ginpromisahan ni Jesus ang kriminal nga ginlansang sa tupad niya sang kabuhi sa palaabuton sa Paraiso. Si Jesus nagsiling: “Sa pagkamatuod ginasiling ko sa imo karon nga adlaw, Mangin kaupod ko ikaw sa Paraiso.” (Lucas 23:43) Talupangda nga si Jesus wala nagsiling kon diin ang Paraiso. Gani, buot bala niya silingon nga maupod sa iya sa langit ang malauton?

Binagbinagon anay naton kon bala kalipikado ina nga malauton para sa kabuhi sa langit. Ang mga may langitnon nga paglaum dapat nabawtismuhan sa tubig kag balaan nga espiritu, nga nagakahulugan nga mga disipulo sila ni Jesus kag gin-adoptar nga mga anak sang Dios. (Juan 3:3, 5) Dapat man nila tumanon ang mga talaksan sang Dios sa moral kag ipakita ang mga kinaiya pareho sang pagkabunayag, integridad, kag kaluoy. (1 Corinto 6:9-11) Dugang pa, dapat magpabilin sila nga mainunungon sa Dios kag sa Cristo asta sa katapusan sang ila kabuhi sa duta. (Lucas 22:28-30; 2 Timoteo 2:12) Paagi lamang sa paglab-ot sini, mangin kalipikado sila nga mabanhaw kag makabaton sang mabug-at nga responsibilidad nga nagahulat sa ila sa langit—nga amo ang paggahom bilang mga saserdote kag hari sa katawhan upod sa Cristo sa sulod sang isa ka libo ka tuig.—Bugna 20:6.

Sa kabaliskaran, ang malauton sa tupad ni Jesus nagkabuhi bilang kriminal asta sa iya kamatayon. (Lucas 23:32, 39-41) Matuod, nagpakita sia sing pagtahod sang nagsiling sia kay Jesus: “Dumduma ako kon magsulod ka sa imo ginharian.” (Lucas 23:42) Pero wala sia nabawtismuhan kag nangin hinaplas nga disipulo ni Jesus. Wala man niya napamatud-an nga matarong sia kag matutom sang buhi pa sia. Gani, rasonable bala nga promisahan sia ni Jesus nga maggahom bilang hari upod sa iya matutom nga mga sumulunod nga nagpabilin nga matutom sa Dios asta sa katapusan?—Roma 2:6, 7.

Sa pag-ilustrar: Kon nangayo sing patawad sa imo ang isa ka tawo nga nagkawat sang imo kuarta, mahimo nga magdesisyon ka nga indi sia pagpasakaan sang kaso. Pero isalig mo bala sa iya ang imo negosyo ukon ang imo pamilya? Itugyan mo lang ini nga mga responsibilidad sa ginasaligan mo gid. Sing kaanggid, ang mga ginhatagan sing paglaum nga kabuhi sa langit dapat magpakita nga masaligan sila sa pagsakdag sa matarong nga mga talaksan sang Dios kon maggahom sila sa katawhan. (Bugna 2:10) Pero ang malauton, bisan pa naghinulsol sia sang ulihi, wala nagpakita nga masaligan sia.

Ginsilingan bala ni Jesus ang malauton nga mangin kaupod sia niya sa langit sina mismo nga adlaw? Imposible ina, kay wala pa si Jesus nagpalangit sina nga adlaw. Sa baylo, ara sia “sa alibutod sang duta,” ukon sa lulubngan, sa sulod sang tatlo ka adlaw. (Mateo 12:40; Marcos 10:34) Bisan sang nabanhaw na sia, nagpabilin pa sia sa duta sing 40 ka adlaw antes sia magpalangit. (Binuhatan 1:3, 9) Gani, indi mahimo nga nagpalangit ang malauton kaupod ni Jesus sina nga adlaw.

Sa diin nga Paraiso makadto ang malauton? Kon banhawon na sia, magaistar sia sa Paraiso sa duta sa idalom sang paggahom ni Jesus. (Binuhatan 24:15; Bugna 21:3, 4) Para mahibaluan mo ang dugang pa parte sa Paraiso kag sa mga ginapatuman sang Dios, makighambal sa isa sang mga Saksi ni Jehova.