Si Jehova ‘ang Nagadala Adlaw-adlaw sang Akon Lulan’

Natawo ako sang 1956 nga may spina bifida. Ang neural tube sa akon taludtod wala nagasira sing maayo kag nahalitan ang akon mga kaugatan, amo nga nagpabudlay ini sa akon paglakat kag nagresulta sa iban pa nga malala nga problema sa panglawas.

Sang wala pa ako matawo, ang akon mga ginikanan gintun-an sa Biblia sang mga misyonero sang mga Saksi ni Jehova. Sang bata pa ako, diutay lamang ang manugbantala sa amon banwa sa Usakos, Namibia. Gani, ginabinagbinag na lang namon subong pamilya ang mga naiskedyul nga materyal para sa miting sa kongregasyon. Sang pito ako ka tuig, ginpa-urostomy ako, isa ka operasyon diin ginbuhuan ang akon lawas para may maguaan ang akon ihi. Sang 14 anyos ako, ginakuyap na ako. Bangod malayo sa amon ang eskwelahan sang hayskul kag kinahanglan ako atipanon sang akon mga ginikanan, wala ako makatapos eskwela.

Pero gintinguhaan ko nga pabakuron ang akon espirituwalidad. Madamo sang aton publikasyon ang indi pa sadto matigayon sa amon lenguahe nga Afrikaans. Gani nagtuon ako magbasa sing Ingles para matun-an ang pila naton ka libro. Nangin manugbantala ako kag nabawtismuhan sa edad nga 19. Sang masunod nga apat ka tuig, madamo ako sing problema sa panglawas kag sa emosyon. Dugang pa, sa amon banwa nga halos tanan kilalahay, ang kahadlok sa tawo nagpugong sa akon nga makigbahin sing makugi sa ministeryo.

Sang beintehon na ako, nagsaylo kami halin sa Namibia pakadto sa South Africa. Sa una nga tion, nakapakig-upod ako sa isa ka kongregasyon. Nalipay gid ako sa sini! Pero, kinahanglan ako operahan liwat—sa sini nga tion, colostomy naman.

Sang ulihi, nabatian ko ang pamulongpulong sang manugtatap sang sirkito parte sa pagpayunir. Natandog gid ako sa iya ginsiling. Nahibaluan ko nga indi mahapos magpayunir bangod sa akon kahimtangan, pero nabatyagan ko kon paano ako ginbuligan ni Jehova sa madamo nga kabudlayan. Gani, nag-aplay ako subong regular payunir. Apang bangod sa akon balatian, wala gin-aprobahan sang mga gulang ang akon aplikasyon.

Pero desidido gihapon ako nga ihatag ang akon bug-os nga masarangan sa ministeryo. Sa bulig sang akon iloy kag sang iban, nalab-ot ko ang oras para sa mga payunir sa sulod sang anom ka bulan. Nagpamatuod ini sang akon determinasyon nga magpayunir kag nagpakita nga indi sablag ang akon balatian. Nag-aplay ako liwat, kag gin-aprobahan na ako. Sang Septiembre 1, 1988, nangin regular payunir ako.

Subong payunir, pirme ko naeksperiensiahan ang suporta ni Jehova. Ang pagtudlo sa iban sang kamatuoran sa baylo nga magkonsentrar sa akon sitwasyon nag-amlig sa akon, naghanas, kag nagbulig nga mag-uswag ako sa espirituwal. Nalipay gid ako sa pagbulig sa pila ka indibiduwal nga magdedikar kag magpabawtismo.

Indi gihapon maayo ang akon panglawas. Pero si Jehova ‘ang nagadala adlaw-adlaw sang akon lulan.’ (Sal. 68:19) Ginasakdag niya ako para masarangan ang mga kabudlayan, kag labaw sa tanan, ginabuligan niya ako nga mangin malipayon sa akon kabuhi!