SABAT SA MGA PAMANGKOT SA BIBLIA
Ano ang palaabuton sang katawhan?
Bangod sa kamatayon ni Jesus, paano nangin posible ang isa ka katilingban nga ang mga tawo nagaulikid sa isa kag isa?
Wala duhaduha nga ang mga tawo padayon nga mag-uswag sa siensia. Apang makatukod bala sila sing katilingban nga ang mga tawo nagaulikid gid sa isa kag isa kon silahanon lang? Indi. Lapnag gid sa kalibutan karon ang pagkamaiyaiyahon kag kakagod. Apang, may mas maayo nga katuyuan ang Dios para sa tawhanon nga pamilya.—Basaha ang 2 Pedro 3:13.
Ginalaragway sang Pulong sang Dios ang isa ka bug-os kalibutan nga katilingban sa palaabuton diin ang mga tawo magahigugmaanay. Ang mga tawo magakabuhi nga may kalig-unan, kag wala gid sing magahalit sa ila.—Basaha ang Miqueas 4:3, 4.
Paano madula ang pagkamaiyaiyahon?
Gintuga sang Dios ang tawo nga wala sing bisan anong huyog nga makagod. Apang sang ginlapas niya ang Dios, nadula sang una nga tawo ang pagkahimpit. Ginpanubli naton sa iya ang huyog nga mangin makagod. Apang, gamiton sang Dios si Jesus agod mapasag-uli ang katawhan sa pagkahimpit.—Basaha ang Roma 7:21, 24, 25.
Nahisuno sa kabubut-on sang Dios, napatay si Jesus bilang halad kag gindula ang epekto sang paglapas sang una nga tawo. (Roma 5:19) Bangod kay Jesus, nangin posible ang isa ka dalayawon nga palaabuton diin madula na sa mga tawo ang makagod nga huyog sa paghimo sing sala.—Basaha ang Salmo 37:9-11.