TOPIKO SA KOBER | MAHANGPAN MO ANG BIBLIA
Ngaa Dapat Mahangpan ang Biblia?
“Ang Biblia kilala nga libro sa relihion. Pero libro ini sang iban nga tawo kag wala sing kahilabtanan sa mga Intsik.”—LIN, CHINA.
“Indi ko gani mahangpan ang balaan nga mga libro sang akon relihion nga Hindu. Ti, paano ko pa mahangpan ang Balaan nga Biblia?”—AMIT, INDIA.
“Ginarespeto ko ang Biblia subong dumaan nga libro kag nabatian ko nga amo ini ang pinakamabakal nga libro. Pero wala pa gid ako makakita sing aktual nga kopya sini.”—YUMIKO, JAPAN.
Madamo nga tawo sa bilog nga kalibutan ang nagarespeto gid sa Biblia. Apang halos wala sila sing nahibaluan sa mga kaundan sang Biblia. Matuod ini sa minilyon nga taga-Asia, pero amo man sini ang nagakatabo sa madamo nga pungsod diin madamo nga tawo ang may Biblia.
Apang mahimo ka mamangkot, ‘Ngaa dapat mangin interesado ako nga mahangpan ang Biblia?’ Ang paghangop sa ginasiling sining sagrado nga libro magabulig sa imo nga mahimo ini:
Matigayon ang pagkakontento kag kalipay
Maatubang ang mga problema sa pamilya
Maatubang sing madinalag-on ang mga kabalaka
Mapauswag ang imo kaangtanan sa iban
Maalamon nga paggamit sing kuarta
Halimbawa, binagbinaga si Yoshiko nga taga-Japan. Nagpalibog sia kon parte sa ano ang Biblia kag ginbasa niya ini. Ano ang resulta? Nagsiling sia: “Ginbuligan ako sang Biblia nga masapwan ang katuyuan sang kabuhi kag ang paglaum sa palaabuton.” Nagdugang pa sia: “Wala na ako nagpalibog parte sini.” Si Amit, nga ginsambit kaina, personal nga nangusisa sa Biblia. “Nagdayaw gid ako,” siling niya. “Ang Biblia nagaunod sang praktikal nga impormasyon para sa tanan.”
May daku gid nga epekto ang Biblia sa kabuhi sang minilyon ka tawo. Ngaa indi mo ini pag-usisaon kag tan-awon kon paano ini makabulig sa imo?