Ang mga Patay Mabuhi!

Mahimo madumduman mo nga si Gail, nga ginsambit kaina, nagaduhaduha kon bala madula ang iya kasubo sa pagkapatay sang iya bana, nga si Rob. Pero ginakalangkagan niya nga makita sia sa bag-ong kalibutan nga ginsaad sang Dios. “Ang akon paborito nga teksto,” siling niya, “amo ang Bugna 21:3, 4.” Ini nagasiling: “Ang Dios mismo mangin kaupod nila. Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”

Si Gail nagsiling: “Maathag nga ginapakita sini nga saad ang matabo. Naluoy gid ako sa mga tawo nga namatyan pero wala nakahibalo sini nga paglaum nga makita liwat ang ila mga pinalangga.” Nanghikot si Gail suno sa iya ginapatihan paagi sa pagpakigbahin sa bug-os tion nga pag-ebanghelyo para isugid sa iban ang saad sang Dios nga sa palaabuton “wala na sing kamatayon.”

‘Daw indi ina mapatihan!’ mahimo isiling mo. Pero binagbinaga ang halimbawa sang tawo nga si Job. Nagmasakit sia sing malubha. (Job 2:7) Bisan pa gusto na ni Job nga mapatay, nagatuo sia gihapon sa gahom sang Dios nga banhawon sia sa duta. May pagsalig sia nga nagsiling: “Taguon mo ako sa Lulubngan . . . Magapanawag ka, kag magasabat ako. Ginahandum mo gid nga makita ang imo binuhatan.” (Job 14:13, 15) Nagasalig si Job nga ginahandum gid sang iya Dios nga buhion sia liwat.

Sa indi madugay, amo gid sina ang himuon sang Dios—kay Job kag sa madamo pa—kon ini nga duta mangin paraiso na. (Lucas 23:42, 43) “May pagkabanhaw,” siling sang Biblia sa Binuhatan 24:15. “Indi kamo matingala sa sini,” pasalig ni Jesus sa aton, “bangod magaabot ang tion nga ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Makita ni Job nga matuman ina nga saad. May paglaum sia nga matigayon liwat ang “kapagsik sang iya pagkapamatan-on” kag ang iya unod magapabilin nga “linghod pa sangsa pamatan-on.” (Job 33:24, 25) Amo man sini ang matabo sa tanan nga nagaapresyar sa maluluy-on nga aman sang Dios nga pagkabanhaw sa duta.

Kon namatyan ka sang pinalangga, ang impormasyon nga ginbinagbinag naton mahimo indi makadula sing bug-os sa imo kasubo. Pero paagi sa pagpamalandong sa mga saad sang Dios nga mabasa sa Biblia, makatigayon ka sing matuod nga paglaum kag kusog nga makapadayon.—1 Tesalonica 4:13.

Gusto mo bala makahibalo sing dugang pa kon paano malandas ang kasubo? Ukon may pamangkot ka bala pareho sang “Ngaa ginatugutan sang Dios ang kalautan kag pag-antos?” Palihug kadtui ang amon website nga jw.org/hil para mahibaluan mo ang makapalugpay nga mga sabat sang Biblia.