Padayon nga Magpamulong Nahanungod sa mga Butang nga Inyo Nakita kag Nabatian
1 Bisan pa ginpahog nga sakiton kag bilangguon, ang mga apostoles nagsiling sa mga manugpamatok sa ila: “Indi kami makauntat sa pagpamulong nahanungod sa mga butang nga amon nakita kag nabatian.” (Binu. 4:20) Gin-apresyar nila ang kabilihanan sang mga binuhatan kag mga panudlo ni Jesus.
2 Ang maayong balita nahanungod kay Jesus kag sa iya Ginharian importante man sa mga tawo sa karon kaangay sang nagligad. Busa, dapat naton himuslan ang tanan nga kahigayunan sa pagpamulong nahanungod sa aton nakita kag nabatian gikan sa Pulong sang Dios.
3 Mga Pamatan-on, Magpamulong sa Eskwelahan: Ginahimuslan sang madamong pamatan-on nga mga Saksi ang kahigayunan sa pagpanaksi sa mga kabutho kag mga manunudlo. Ang isa ka pamatan-on nga Saksi nga pirme nagapanikasog sa paghibalo sang ulihi nga topiko nga ginahambalan sang iya mga kabutho naghimulos sang isa ka hitabo sa eskwelahan kag nagsugilanon sa mga manunudlo kag mga kabutho upod ang nagakaigo nga publikasyon. Ang resulta? Nakapahamtang sia sing 35 ka libro sa isa ka adlaw! Sanglit madamo nga tawo karon ang nabalaka nahanungod sa paghidait, indi bala maayo nga sugiran ang mga kabutho kag mga manunudlo kon paano si Jesus subong nagagahom nga Hari magalubad sang mga problema sa kalibutan?—Ipaanggid ang Lucas 2:14.
4 Kon ang indi mo pag-entra sa mga pagsaulog sang Krismas sang nagligad nga Disiembre nagpautwas sing pila ka pamangkot, mahimo ka makasiling:
◼ “Wala ako mag-entra sa mga kapiestahan sang Krismas bangod ina nga mga selebrasyon wala nagapadungog kay Jesus subong amo lamang ang aton paagi sang kaluwasan kag sia lamang ang magatapos sang inaway. [Balikwata ukon basaha ang Binuhatan 4:12.] Si Jesus indi na isa ka lapsag kundi isa ka nagagahom nga Hari. Ining libro, Ang Pinakabantog nga Tawo nga Nagkabuhi, nagahinun-anon sang tanan nga mga panudlo kag mga milagro ni Jesus kag nagapakita kon paano niya tapuson ang pag-antos sang katawhan.” Nian ipakita ang ilustrasyon sa kapitulo 133, kag basaha ang ikaduha nga parapo sa masunod nga pahina. Ipakita ang iban nga mga punto nga sa banta mo magaganyat sa tawo kag itanyag ang libro.
5 Makighambal sa mga Kaupod sa Trabaho: Ang isa ka utod nga lalaki nakapahamtang sing 63 ka libro paagi lamang sa pagbutang sang isa ka kopya sang Pinakabantog nga Tawo nga libro sa iya lamesa. Ang matahom nga dagway kag ang titulo lamang sini nagapukaw sing mga pamangkot. Mahimo mo lang pamangkuton ang isa ka kaupod sa trabaho: “Sin-o ang masiling mo nga pinakabantog nga tawo nga nagkabuhi?” Nian magdugang: “Ini nga libro detalyado nga nagatuptop sang bug-os nga kabuhi ni Jesus, nagabinagbinag sang tagsa ka pamulongpulong nga ginhatag niya, nagasabat sang mga pamangkot nga ginapamangkot sang madamo nahanungod sa iya mga milagro, kag nagahatag sang iban pa makawiwili nga mga detalye. Isa ini ka tul-id nga repaso kon ano ang ginatudlo sang Biblia nahanungod kay Jesus kag nagapamatuod sing maathag nga si Jesucristo amo ang pinakabantog nga tawo nga nagkabuhi.” Nian patuhuyi ang komento ni Napoléon nahanungod kay Jesus subong sang ginbalikwat sa ikatlo nga parapo sang introduksion sa libro.
6 Mahimo mag-utwas man ang kaanggid nga mga kahigayunan agod makapanaksi sa mga kaingod ukon sa ditumuluo nga mga himata. Mangamuyo nga si Jehova magahatag sa imo sing kasidla kag ikasarang sa pagpamulong sa nagakaigo nga tion. (Binu. 4:29, 31) Ano pa ang mas maayo nga eksperiensia nga matigayon naton sang sa buligan ang kabutho, kaupod sa trabaho, kaingod, ukon himata nga maglakat sa dalan padulong sa kabuhi nga dayon?—Juan 14:6.