Pamangkot

◼ Nagakaigo bala nga kopyahon ang mga publikasyon sang Sosiedad para ipanagtag sa iban?

Mga tinuig na nga ang Sosiedad nagbalhag sing madamo nga publikasyon nga nagahinun-anon sang halos tanan nga bahin sang ihibalo sa Biblia. Ang mga indibiduwal nga nakatuon sang kamatuoran sining karon lamang nga mga tinuig mahimo magbatyag nga nawasi nila ang mga benepisyo sang materyal nga ginbalhag sang nagligad kag nga indi na matigayon paagi sa Sosiedad. Ang iban nanikasog sing lakas nga makakuha sing mga kopya sang daan nga mga publikasyon, kag ginkopya mismo sang iban ang mga publikasyon sang Sosiedad kag ginpaposible nga matigayon ini sa nanuhaytuhay nga paagi. Naglakip ini sang aktuwal nga pag-imprinta liwat sa mga publikasyon kag subong man sang mga reproduksion paagi sa kompyuter. Sa pila ka hitabo, ginhimo ini para makaganansia.

Ang matutom nga “ulipon” nakahibalo sang aton espirituwal nga mga kinahanglanon kag nagaaman sa “nagakaigo nga tion.” (Mat. 24:45) Sang kinahanglan nga ipaguwa liwat ang materyal nga ginbalhag sang nagligad, ang Sosiedad naghimo sing mga kahimusan para sa sina. Halimbawa, ang mga bound volume sang The Watchtower halin sang 1960 tubtob 1985 gin-imprinta liwat kag mahimo matigayon. Apang, kon ang mga indibiduwal magasugod sa pagkopya kag sa pagpanagtag sina nga materyal, ang dikinahanglanon nga mga problema magautwas.

Daku nga mga problema ang magautwas kon ining materyal ginakopya kag ginapanagtag para makaganansia. Ang “Pamangkot” sa Agosto 1977 sang Ang Aton Ministeryo sa Ginharian nagsiling: “Labing maayo nga indi paghingalitan ang teokratikong mga pag-inupdanay paagi sa pagpakilala ukon pagpahibalo sang pagbaligya sing bisan ano nga butang ukon serbisyo para makaganansia sa Kingdom Hall, sa mga pagtinuon sang kongregasyon sa libro kag sa mga asambleya sang katawhan ni Jehova. Magabulig ini sa aton sa paghatag sing bug-os nga igtalupangod sa espirituwal nga mga interes nga nagakaigo sa ila kag sa paghupot sa komersial nga buhat sa iya nagakaigo nga duog.” Busa, importante nga likawan naton ang mangin mahunahunaon sa ganansia kon tuhoy sa pagnegosyo sang Pulong sang Dios ukon sa mga butang may kaangtanan sa sini.