Ang Balaan nga Panudlo May Makusog nga Epekto

¹ Daw ano nga pribilehiyo nga makabaton kita sing panudlo gikan sa Isa nga Balaan, ang aton Manunuga, si Jehova nga Dios! (Sal. 50:1; Isa. 30:20b) Gikan sa tanan nga kapungsuran sa karon, kadam-an ang nagadugok sa iya bukid sang putli nga pagsimba agod magpatudlo sa iya. (Miq. 4:2) Ang minilyon pa nga iban nagapalista sa mga eskwelahan nga nagapakataas sang kalibutanon nga kaalam. Apang ang kaalam nga wala nagasapak kay Jehova kag sa iya nasulat nga Pulong buangbuang sa itululok sang Dios.​—Sal. 14:1; 1 Cor. 1:25.

² Epekto sa Cristianong Pagkabuhi: Ang balaan nga panudlo nagabulig sa aton sa pagdihon sang aton mga konsiensia. Ang tagsatagsa ginbun-ag nga may konsiensia, apang agod maggiya ini sa aton sa dalan sang pagkamatarong, dapat ini hanason. (Sal. 19:​7, 8; Roma 2:15) Ang katawhan sang kalibutan wala magdihon sang ila panghunahuna suno sa Pulong sang Dios, kag bangod sina nga rason nagumon sila kag dipat-od kon ano ang husto kag kon ano ang sala. May mainit nga mga sinuay tuhoy sa moral nga mga hulusayon bangod ang kada isa nagainsister sa paghimo kon ano ang husto sa iya kaugalingon nga mga mata. Luyag sang kalabanan ang bug-os nga kahilwayan sa pagpamat-od sang ila kaugalingon nga dalanon sang kabuhi. Nagadumili sila sa pagpamati sa lamang nga tuburan sang matuod nga kaalam. (Sal. 111:10; Jer. 8:9; Dan. 2:21) Apang ang balaan nga panudlo namat-od sina nga mga hulusayon para sa aton, kag nagapabilin kita nga nahiusa subong panimalay sang Dios bangod ginatudluan niya kita. Masinaligon nga ginaatubang naton ang palaabuton nga may maayong konsiensia, nagapabilin nga masako sa aton ministeryo.

³ Ang balaan nga panudlo nagabulig sa aton sa pagbato sang “tagsa ka hangin sang panudlo.” (Efe. 4:14) Wala kita nagadayaw sa pagtuon sa pilosopiya, nga nagahimo sa mga tawo nga mga palapangita sing sala kag mga maduhaduhaon, nagapalig-on sang pagkamaiyaiyahon, kag nagadul-ong sa moral nga pagkalusod. Nalipay kita magpatudlo kay Jehova, kag busa nalikawan naton ang kasubo kag kasakit nga naeksperiensiahan sang madamo. Ang mga kasuguan kag mga pahanumdom ni Jehova kaangay sang ‘pulong sa likod naton,’ nga nagasiling: “Ini amo ang dalan. Lakat kamo sa sini.”​—Isa. 30:21.

⁴ Ang Aton mga Miting kag Ministeryo: Ginatamod naton ang Hebreo 10:​23-25 subong isa ka sugo halin sa Dios. Sa mga miting sa kongregasyon, ginatudluan kita ni Jehova. Kinabatasan bala naton nga pirme magtambong sa mga miting, ukon ginatamod bala naton ang pagtambong sa miting subong indi tanto ka importante? Dumduma, ang pagtilipon sing tingob bahin sang aton pagsimba. Indi ini dapat pagkabigon nga indi obligado. Indi naton luyag mawasi ang bisan anong bahin sang programa sang espirituwal nga pagpakaon nga ginhanda ni Jehova para sa aton.

⁵ Si Moises nangamuyo sa Dios: “Tudlui kami sa pag-isip sang amon mga adlaw agod nga makaagom kami sing tagipusuon nga may kaalam.” (Sal. 90:12) Amo man bala sini ang aton pangamuyo? Ginaapresyar bala naton ang tagsa ka hamili nga adlaw? Kon amo, ‘magaagom kita sing tagipusuon nga may kaalam’ paagi sa paghinguyang sang tagsa ka adlaw sa mapuslanon nga paagi, sa himaya sang aton Dakung Instruktor, si Jehova nga Dios. Ang balaan nga panudlo magabulig sa aton sa paghimo sina.